എല്ലാമെല്ലാം ചതുർവർണ മയം

ഷാർജ: യു.എ.ഇയുടെ 46ാം ദേശീയ ദിനത്തിന് ആശംകളർപ്പിച്ച് രാജ്യമാകെ ചതുർവർണ ചന്തമണിഞ്ഞു. വിണ്ണിലും മണ്ണിലും നൻമയുടെ നാലുവർണ ചന്തം തന്നെ. ഭക്ഷണത്തിലും വസ്​ത്രത്തിലും വാഹനത്തിലും അന്തരീക്ഷത്തിലും കടലിലും അലയടിക്കുകയാണ് പെറ്റമ്മ നാടിനോടും പോറ്റമ്മ നാടിനോടുമുള്ള സ്​നേഹം. പകൽ ചന്തങ്ങൾ അസ്​തമിച്ച് രാക്കുളിര് പരക്കുമ്പോൾ വൈദ്യൂത ദീപ പ്രഭയിൽ ആറാടുകയായി ചതുർവർണം. ചത്വരങ്ങളും ഉദ്യാനങ്ങളും കവലകളും വീഥികളും ഭവനങ്ങളും കെട്ടിടങ്ങളും മലമുകളിലെ ഗാഫ് മരചില്ലകളും വൈദ്യൂത ദീപാലകൃതം. കനാലുകളിലൂടെ നീങ്ങുന്ന ഉല്ലാസ നൗകകളിൽ നിന്ന് സ്വദേശി ഗായകരായ ഹുസൈൻ ആൽ ജസ്​മിയും ബൽക്കീസും പാടുന്ന ദേശഭക്തി ഗാനങ്ങൾ പുറത്തേക്കൊഴുകുന്നു. പ്രവാസികൾ ജനസേവന പ്രവർത്തനങ്ങൾ കൂടുതൽ സജീവമാക്കിയാണ് ദേശീയ ദിനത്തിന് ആശംസകളും പ്രാർഥനകളും അർപ്പിക്കുന്നത്. രക്തദാനം എല്ലാ എമിറേറ്റുകളിലും നടക്കുന്നു.