നരേന്ദ്രമോദി ഇന്ന്​ യു.എ.ഇയിൽ

അബൂദബി: ഇന്ത്യൻ പ്രധാനമന്ത്രി നരേന്ദ്രമോദിയുടെ യു.എ.ഇ സന്ദർശനം ശനിയാഴ്​ച ആരംഭിക്കുന്നു. ഫലസ്​തീനിൽനിന്ന്​ വൈകുന്നേരത്തോടെ അബൂദബിയിലാണ്​ അദ്ദേഹമെത്തുക. മൂന്ന്​ വർഷത്തിനിടെ മോദി നടത്തുന്ന രണ്ടാമത്​ യു.എ.ഇ സന്ദർശനമാണിത്​.
അബൂദബിയിലും ദുബൈയിലുമായി നിരവധി പരിപാടികളാണ്​ പ്രധാനമന്ത്രിയുടെ സന്ദർശനത്തിനിടെ ആസൂത്രണം ചെയ്​തിരിക്കുന്നത്​. 
ശനിയാഴ്​ച അബൂദബിയിൽ യു.എ.ഇ ഭരണാധികാരികളുമായി അദ്ദേഹം ചർച്ച നടത്തു​ം. ഞായറാഴ്​ച രാവിലെ ഒമ്പതോടെ രക്​തസാക്ഷികളായ യു.എ.ഇ സൈനികരുടെ സ്​മാരകമായ വഹത്​ അൽ കറാമ സന്ദർശിച്ച ശേഷം ദുബൈയിലേക്ക്​ തിരിക്കും. ദുബൈയിലെ ഒപേറ ഹൗസിൽ 9.30ന്​ നടക്കുന്ന ചടങ്ങിൽ മോദി ഇന്ത്യൻ സമൂഹത്തെ അഭിസ​ംബോധന ചെയ്യും. അബൂദബിയിൽ നിർമിക്കുന്ന പ്രഥമ ക്ഷേത്രത്തി​​​െൻറ പ്രതീകാത്​മക ശിലാന്യാസം 10.30ന്​ അദ്ദേഹം നിർവഹിക്കും. തുടർന്ന്​ ദുബൈയിലെ മദീനത്​ ജുമൈറ ഹോട്ടലിൽ നടക്കുന്ന ലോക സർക്കാർ സമ്മേളനത്തിൽ മുഖ്യാതിഥിയായി പ​െങ്കടുക്കും. 26 രാഷ്​ട്രത്തലവന്മാരും പ്രധാനമന്ത്രിമാരും ഉൾപ്പെടെയുള്ള 2000ത്തിലധികം പ്രതിനിധി സംഘത്തെ അഭിസംബാധന ചെയ്​ത്​ മോദി സംസാരിക്കും. ഉച്ചക്ക്​ ശേഷം പ്രധാനമന്ത്രി ഒമാനിലേക്ക്​ പോകും.
മോദിയുടെ സന്ദർശനത്തിനിടെ ഇന്ത്യയും യു.എ.ഇയും തമ്മിൽ 12 മുതൽ 14 വരെ കരാറുകളിൽ ഒപ്പുവെക്കുമെന്ന്​ ഇന്ത്യയിലെ യു.എ.ഇ സ്​ഥാനപതി ഡോ. അഹ്​മദ്​ ആൽ ബന്ന വ്യക്​തമാക്കി. സാമ്പത്തികം, ബഹിരാകാശ സാ​േങ്കതികവിദ്യ, വൈദഗ്​ധ്യ വികസനം തുടങ്ങിയ മേഖലകളുമായി ബന്ധപ്പെട്ട ധാരണകളിലാണ്​ ഇരു രാജ്യങ്ങളും ഏർപ്പെടുക. 
2015ൽ മോദി നടത്തിയ യു.എ.ഇ സന്ദർശനത്തിൽ 14ഒാളം കരാറുകളാണ്​ ഒപ്പുവെച്ചിരുന്നത്​. 2017​ൽ ഇന്ത്യൻ റിപ്പബ്ലിക്​ ദിന ചടങ്ങിൽ മുഖ്യാതിഥിയായി പ​െങ്കടുക്കാൻ അബൂദബി കിരീടാവകാശിയും യു.എ.ഇ സായുധ സേനാ ഡെപ്യൂട്ടി സുപ്രീം കമാൻഡറുമായ ജനറൽ ശൈഖ് മുഹമ്മദ് ബിൻ സായിദ് ആൽ നഹ്​യാൻ ന്യൂഡൽഹിയിലെത്തിയപ്പോൾ ഇരു രാജ്യങ്ങളും തമ്മിൽ 14 കരാറുകളിൽ ഒപ്പുവെച്ചിരുന്നു. 
കഴിഞ്ഞ വർഷം തന്നെ യു.എ.ഇയും ഇന്ത്യയും തമ്മിൽ മറ്റൊരു 17 ധാരണകളിലും ഒപ്പിട്ടിരുന്നു.