ഹയ്യ കാർഡുള്ളവർക്ക്​ യു.എ.ഇയിൽ​ 100 ദിർഹമിന്​ മൾട്ടിപ്പിൾ എൻട്രി വിസ

ദുബൈ: ലോകകപ്പ്​ സമയത്ത്​ ഖത്തറിലേക്കുള്ള പ്രവേശന പാസായ ഹയ്യാ കാർഡുള്ളവർക്ക്​ യു.എ.ഇയിൽ 100 ദിർഹമിന്​ മൾട്ടിപ്പിൾ എൻട്രി വിസ. 90 ദിവസത്തെ വിസയാണ്​ യു.എ.ഇ അനുവദിക്കുന്നത്​. 90 ദിവസത്തിന്​ ശേഷം വിസ വീണ്ടും പുതുക്കാൻ കഴിയുമെന്നും അധികൃതർ അറിയിച്ചു. ഇതോടെ, ഖത്തറിലേക്ക്​ പറക്കുന്ന ഫുട്​ബാൾ ആരാധകർക്ക്​ കുറഞ്ഞ ചെലവിൽ യു.എ.ഇയും സന്ദർശിക്കാൻ കഴിയും.

ലോകകപ്പിനെത്തുന്നവരിൽ നല്ലൊരു ശതമാനവും ദുബൈയിലായിരിക്കും താമസം. ദുബൈയിൽ നിന്ന്​ 45 മിനിറ്റിനുള്ളിൽ ഖത്തറിൽ പറന്നെത്താൻ കഴിയും. മാത്രമല്ല, പ്രധാന വിമാനക്കമ്പനികളെല്ലാം ദിവസേന ഷട്ടജഇ സർവീസ്​ നടത്തുന്നുണ്ട്​. ഹോട്ടലുകളിൽ നല്ലൊരു ശതമാനവും ഫാൻസ്​ ബുക്ക്​ ചെയ്തുകഴിഞ്ഞു.

മൾട്ടിപ്പ്ൾ എൻട്രി വിസ ലഭിക്കാൻ:

https://smartservices.icp.gov.ae എന്ന വെബ്​സൈറ്റ്​ സന്ദർശിക്കുക

പബ്ലിക്​ സർവീസ്​, ഹയ്യ കാർഡ്​ ഹോൾഡേഴ്​സ്​ എന്നിവ സെലക്ട്​ ചെയ്യുക

പാസ്​പോർട്ട്​ ഉൾപെടെയുള്ള വിവരങ്ങൾ നൽകുക

എന്താണ്​ ഹയ്യാ കാർഡ്​:

ലോകകപ്പ്​ സമയത്ത്​ വിദേശത്ത്​ നിന്നുള്ളവർക്ക്​ ഖത്തറിൽ ഇറങ്ങണമെങ്കിൽ ഹയ്യാ കാർഡ്​ നിർബന്ധമാണ്​. മാച്ച്​ ടിക്കറ്റ്​ സ്വന്തമാക്കിയ എല്ലാ കാണികൾക്കും സ്വന്തം പേരിൽ ഹയ്യാ കാർഡിന്​ അപേക്ഷിക്കാം​. ഖത്തറിനു പുറത്തു നിന്ന്​ അപേക്ഷിച്ചാൽ അഞ്ചു ദിവസത്തിനുള്ളിലും ഖത്തറിൽ നിന്നുള്ള അപേക്ഷകന്​ മൂന്ന്​ ദിവസത്തിനുള്ളിലും അംഗീകാരം ലഭിക്കും. നിശ്​ചിത ദിവസം കഴിഞ്ഞിട്ടും അപേക്ഷയിൽ നടപടിയായില്ലെങ്കിൽ 0097444412022 ഹയ്യാകാർഡ്​ കാൾസെന്‍ററിൽ ബന്ധപ്പെടാവുന്നതാണ്​.

ഫിഫ അംഗീകൃത ഭാഷകളിൽ കാൾസെന്‍റർ സേവനം ലഭ്യമാവും. ഖത്തറിലെ ലോകകപ്പ്​ വേദികളിലേക്ക്​ പ്രവേശിക്കാനും ഈ കാർഡ്​ നിർബന്ധമാണ്​. മെട്രോ-കർവ ബസ്​ ഉൾപ്പെടെയുള്ള പൊതുഗതാഗത യാത്രക്കും ലോകകപ്പ്​ വേളയിലെ നിരവധി വിനോദ പരിപാടികളിലേക്കുള്ള പ്രവേശനത്തിനും ഹയ്യ കാർഡ്​ ഉപയോഗിക്കാം. ലോകകപ്പ്​ ഫൈനൽ കഴിഞ്ഞ്​ ഡിസംബർ 23 വരെ ഹയ്യ കാർഡ്​ വഴി പ്രവേശിക്കാവുന്നതാണ്​.