മുബാദല ടെന്നിസ് തിരിച്ചുവരുന്നു

അബൂദബി: കോവിഡ്​ മൂലം കഴിഞ്ഞ വർഷം മുടങ്ങിയ മുബാദല വേൾഡ് ടെന്നിസ് ചാമ്പ്യൻഷിപ് വീണ്ടും എത്തുന്നു.

ഡിസംബർ 16 മുതൽ 18വരെ അബൂദബി സായിദ് സ്‌പോർട്‌സ് സിറ്റിയിലെ ഇൻറർനാഷനൽ ടെന്നിസ് സെൻററിലാണ്​ ചാമ്പ്യൻഷിപ്. ലോകത്തിലെ ആറ് മുൻനിര പുരുഷ ടെന്നിസ് താരങ്ങളും രണ്ട് മുൻനിര വനിതാകളിക്കാരും മൂന്ന് ദിവസത്തെ മത്സരത്തിൽ മാറ്റുരക്കും. കോവിഡ് സുരക്ഷയോടെയാണ് മത്സരം സംഘടിപ്പിക്കുക. ലോകത്തിലെ മികച്ച താരങ്ങൾ അണിനിരക്കുന്ന ടൂർണമെൻറാണിത്​.നിശ്ചിത അളവിൽ കാണികളെ അനുവദിക്കും.

എല്ലാ രാജ്യങ്ങളിലെയും പ്രതിരോധ കുത്തിവെപ്പെടുത്ത സന്ദർശകർക്ക് ചാമ്പ്യൻഷിപ് വേദിയിൽ പ്രവേശിക്കാനവസരമൊരുക്കുമെന്ന് സംഘാടകരായ ഫ്ലാഷ് എൻറർടൈൻമെൻറ് സി.ഇ.ഒ ജോൺ ലിക്കരിഷ് പറഞ്ഞു. വൻ ജനപങ്കാളിത്തത്തോടെയാണ്​ മുൻ ടൂർണമെൻറുകൾ നടന്നിരുന്നത്​. നിറ ഗാലറിക്ക്​ മുന്നിലായിരുന്നു മത്സരങ്ങൾ.