മദർ ഒാഫ്​ നാഷൻ ഫെസ്​റ്റിവൽ സമാപിച്ചു

അബൂദബി: യു.എ.ഇയുടെ പൈതൃകവും സാംസ്​കാരിക തനിമയും പ്രതിഫലിപ്പിച്ച മദർ ഒാഫ്​ നാഷൻ ഫെസ്​റ്റിവലിന്​ സമാപനം. മാർച്ച്​ 21 മുതൽ 31 വരെ നടന്ന ഉത്സവത്തിൽ നൂറിലധികം വി​ജ്ഞാന-വിനോദ പരിപാടികളാണ്​ അവതരിപ്പിച്ചത്​. കുട്ടികൾ ഉൾപ്പെടെയുള്ള കുടുംബങ്ങൾക്ക്​ ആസ്വദിക്കാവുന്ന കലാപ്രദർശനങ്ങളും സംഗീത-വിനോദ-ഹാസ്യ പരിപാടികളും നടന്നു. അറിവ്​ പകരുന്ന ശിൽപശാലകളും ഫെസ്​റ്റിവലി​​​െൻറ ഭാഗമായി. ഇമാറാത്തി വനിതകളുടെ സർഗാത്​മകത പ്രദർശിപ്പിക്കുന്ന മ്യൂസിയത്തിന്​ സമാനമായ പവലിയൻ ഏറെ പേരെ ആകർഷിച്ചു.

സമാപനത്തോടനുബന്ധിച്ച്​ വെള്ളിയാഴ്​ചയും ശനിയാഴ്​ചയും നടന്ന ഡ്രോൺ ഷോ കാണികൾക്ക്​ വിസ്​മയകാഴ്​ചയൊരുക്കി. ലെഡ്​ ലൈറ്റുകൾ ഘടിപ്പിച്ച ഡ്രോണുകൾ പ്രകാശത്താൽ ആകാശത്ത്​ സായിദ്​ വർഷ ലോഗോ വരച്ചിട്ടു.  ഇത്തരം ഷോ മിഡിലീസ്​റ്റിൽ ആദ്യമായാണ്​ അവതരിപ്പിക്കുന്നത്​. 500ഒാളം ഡ്രോണുകളാണ്​ ഇതിനായി പറത്തിയത്​. ജനറൽ വിമൻസ്​ യൂനിയൻ ചെയർ വുമണും മദർഹുഡ്​^ചൈൽഡ്​ഹുഡ്​ സുപ്രീം കൗൺസിൽ പ്രസിഡൻറും കുടുംബ വികസന ഫൗണ്ടേഷൻ സുപ്രീം ചെയർ വുമണുമായ ശൈഖ ഫാത്തിമ ബിൻത്​ മുബാറക്കിനുള്ള ആദരമായാണ്​ മദർ ഒാഫ്​ നാഷൻ ഫെസ്​റ്റിവൽ സംഘടിപ്പിക്കുന്നത്​.