മാതാവിനെതിരെ സദാചാര കുറ്റം; മക്കളുടെ സംരക്ഷണം പിതാവിന്​ നൽകി കോടതി

അൽഐൻ: സദാചാര കുറ്റം ചൂണ്ടിക്കാട്ടി മാതാവിൽ നിന്ന്​ നാല്​ കുട്ടികളുടെ സംരക്ഷണം പിതാവിന്​ കൈമാറി അൽ ഐനിലെ കോടതി. അറബ്​ വംശജയായ യുവതിക്കെതിരെ മുൻ ഭർത്താവ്​ സമർപ്പിച്ച ഹരജിയിലാണ്​ അൽഐൻ സിവിൽ, കൊമേഴ്​സ്യൽ, അഡ്​മിനിസ്​ട്രേറ്റീവ് ക്ലെയിം​ കോടതി വിധി പ്രസ്താവിച്ചത്​. ക്രിമിനൽ കേസിൽ ശിക്ഷ ലഭിച്ചതിനാൽ തന്‍റെ കുട്ടികളെ വളർത്താൻ മാതാവ്​ യോഗ്യയല്ലെന്ന്​ ചൂണ്ടിക്കാണിച്ചാണ്​ ഭർത്താവ്​ കോടതിയെ സമീപിച്ചത്​.

വിദേശിയായ അന്യ പുരുഷനുമായി ഹോട്ടൽ മുറിയിൽ വെച്ച്​ യുവതിയെ കണ്ടെത്തിയിരുന്നതായി മുൻ ഭർത്താവ്​ ആരോപിച്ചു. സംഭവത്തിൽ സദാചാര ലംഘനത്തിന്​ പൊലീസ്​ കേസ്​ രജിസ്റ്റർ ചെയ്തിരുന്നതായും ഭർത്താവ്​ ബോധിപ്പിച്ചു. ഇക്കാര്യങ്ങൾ പരിഗണിച്ച കോടതി ക്രിമിനൽ കേസിൽ ശിക്ഷിക്കപ്പെടുന്നതോടെ സംരക്ഷക എന്ന നിലയിലുള്ള വിശ്വാസം യുവതിക്ക്​ നഷ്​ടപ്പെട്ടതായി വ്യക്​തമാക്കുകയും കുട്ടികളുടെ സംരക്ഷണം യുവാവിന്​ വിട്ടുനൽകി വിധി പ്രസ്താവിക്കുകയുമായിരുന്നു. കുട്ടികളുടെ സംരക്ഷണം എന്നത്​ ഉത്തരവാദിത്തവും വിശ്വാസവുമാണെന്നും ഈ വിശ്വാസം നിറവേറ്റുന്നതിന്​ നിയമരപമായ കീഴ്വഴക്കം ഉയർത്തിപ്പിടിക്കുന്ന മതപരമായ ​പ്രതിബദ്ധതയും കഴിവും ആവശ്യമാണെന്നും കോടതി വിധിന്യായത്തിൽ വ്യക്​തമാക്കി. മുൻ ഭർത്താവ്​ മയക്കുമരുന്നിന്​ അടിമയാണെന്ന്​ യുവതിയുടെ ആരോപണ തെളിവുകളുടെ അഭാവത്തിൽ കോടതി തള്ളുകയും ചെയ്തു.