ഹത്തയുടെ ചരിത്ര വീഥിയിലൂടെ  ആർ.ടി.എ ജീവനക്കാരികൾ

ദുബൈ:  എമിറേറ്റിലെ പ്രധാന വിനോദ സഞ്ചാര പൈതൃക മേഖലയായി മാറാനൊരുങ്ങുന്ന ഹത്തയുടെ  ചരിത്ര വീഥികളിലേക്ക്​ റോഡ്​ ഗതാഗത അതോറിറ്റി ജീവനക്കാരികൾ സംഘയാത്ര നടത്തി. വികസനത്തിൽ രാഷ്​ട്ര നേതൃത്വം പ്രത്യേക ശ്രദ്ധ നൽകുന്ന ഇൗ മേഖലയുടെ പ്രാധാന്യം ജീവനക്കാർക്കും അവരുടെ കുടുംബങ്ങൾക്കും പകർന്നു നൽകുക എന്ന താൽപര്യത്തോടെയാണ്​ ആർ.ടി.എ വനിതാ കമ്മിറ്റി യാത്ര സംഘടിപ്പിച്ചത്​. ജീവനക്കാരികൾക്ക്​ വിനോദവും സന്തോഷവും നൽകുന്നതിനൊപ്പം നാടിനെക്കുറിച്ച്​ കൂടുതൽ അറിയാനും അഭിമാനകരമായ ചരിത്രബോധം നൽകാനും ഇത്തരം യാത്രകൾ ലക്ഷ്യമിടുന്നുണ്ടെന്ന്​ വനിതാ കമ്മിറ്റി അധ്യക്ഷ മൊഅസ അൽ മറി പറഞ്ഞു. പൈതൃക ഗ്രാമത്തിൽ16ാം നൂറ്റാണ്ടിൽ പണിത കോട്ട, ഹത്ത വാലി, അണക്കെട്ട്​, തല്ല പാർക്ക്​ എന്നിവിടങ്ങളിൽ സംഘം സന്ദർ​ശനം നടത്തി.