മന്ത്രിസഭാ യോഗത്തിൽ സംബന്ധിക്കാൻ വയോധികന്​ ശൈഖ്​ മുഹമ്മദി​െൻറ ക്ഷണം

ദുബൈ: ജീവിത ചെലവേറുന്നതു സംബന്ധിച്ച്​ റേഡിയോ പരിപാടിയിലൂടെ വേദന പങ്കുവെച്ച ഇമറാത്തി വയോധികന്​ ഇന്ന്​ നടക്കുന്ന യു.എ.ഇ മന്ത്രിസഭാ യോഗത്തിൽ പങ്കുചേരാൻ ശൈഖ്​ മുഹമ്മദി​​​െൻറ ക്ഷണം. അജ്​മാൻ റേഡിയോയുടെ തത്സമയ പരിപാടിയിലൂടെ സങ്കടം പറഞ്ഞ റാസൽഖൈമ സ്വദേശിയായ അൽ മസ്​റൂഇ(57)യെ അവതാരകൻ പരിഹസിച്ചതായി പരാതി ഉയർന്നതിനെ തുടർന്ന്​  യു.എ.ഇ വൈസ്​ പ്രസിഡൻറും പ്രധാനമന്ത്രിയും ദുബൈ ഭരണാധികാരിയുമായ ശൈഖ്​ മുഹമ്മദ്​ ബിൻ റാശിദ്​ ആൽ മക്​തൂം വിഷയത്തിൽ ഇടപെട്ടിരുന്നു. 

അദ്ദേഹത്തിനും കുടുംബത്തിനും ആവശ്യമായ സൗകര്യങ്ങളെല്ലാം 24 മണിക്കൂറിനകം ഒരുക്കി നൽകാനും ഉത്തരവിട്ടിരുന്നു. അതിനു പിന്നാലെയാണ്​ താഴ്​ന്ന വരുമാനക്കാരായ പൗരൻമാർ എങ്ങിനെ ജീവിക്കുന്നു എന്നത്​ ചർച്ച ചെയ്യാനും അവർക്കുള്ള ക്ഷേമപദ്ധതിക്ക്​ രൂപം നൽകാനും ലക്ഷ്യമിടുന്ന മ​ന്ത്രിസഭാ യോഗത്തിലേക്ക്​ ക്ഷണിക്കാൻ വൈസ്​ പ്രസിഡൻറ്​ തീരുമാനിച്ചത്​. ഇക്കാര്യം യു.എ.ഇ വാർത്ത ഏജൻസിയായ വാം ആണ്​പുറത്തുവിട്ടത്​.