ഏഴ്​ വയസ്സുകാരി ക്ഷണിച്ചു;  സ്​നേഹ വിരുന്നൊരുക്കി അബൂദബി പൊലീസ്​

അബൂദബി: ഉച്ചഭക്ഷണം കഴിക്കാൻ പൊലീസ്​ ഉദ്യോഗസ്​ഥരെ ത​​​​െൻറ വീട്ടിലേക്ക്​ ക്ഷണിച്ച ഏഴ്​ വയസ്സുകാരിക്ക്​ അബൂദബി പൊലീസ്​ സ്​നേഹവിരുന്നൊരുക്കി. 999 അടിയന്തര ഫോൺ നമ്പറിൽ വിളിച്ചാണ്​ ലൈല ആൽ ഹുസനി എന്ന ബാലിക ​പൊലീസുകാരെ ഉച്ചഭക്ഷണത്തിന്​ ക്ഷണിച്ചത്​. അപ്പോൾ നന്ദി അറിയിച്ച പൊലീസ്​ പിന്നീട്​ ലൈലക്ക്​ വേണ്ടി വിരുന്നൊരുക്കുകയായിരുന്നു. ‘പൊലീസ്​ ചങ്ങാതികൾ’ പദ്ധതിയുടെ ഭാഗമായാണ്​ ലൈലയെ വിരുന്നിന്​ ക്ഷണിച്ചത്​. പൊലീസ്​ മാമന്മാരോടൊപ്പമിരുന്ന്​ ഭക്ഷണം കഴിച്ച്​ സന്തോഷവതിയായ ലൈലയെ കൈ നിറയെ സമ്മാനങ്ങളും നൽകിയാണ്​ ഒാഫിസർമാർ​ യാത്രയാക്കിയത്​. 

പൊലീസ്​ ഒാപറേഷൻ റൂമിൽ വരുന്ന ഒരു ഫോൺവിളിയും പരിഗണിക്കപ്പെടാതെ പോകാറില്ലെന്ന്​ അബൂദബി പൊലീസ്​ ഒാപറേഷൻ വകുപ്പ്​ ഡയറക്​ടർ ബ്രിഗേഡിയർ നാസർ ആൽ മസ്​കരി പറഞ്ഞു. ജനങ്ങളുടെ ജീവൻ രക്ഷിക്കേണ്ടതും മറ്റുമായ അടിയന്തര ഫോൺവിളികൾക്ക്​ മുൻഗണന നൽകുന്നുണ്ട്​. ഫോൺ അനാവശ്യമായി ഉപയോഗിക്കുന്നതിൽനിന്ന്​ കുട്ടികളെ രക്ഷിതാക്കൾ തടയണമെന്നും അടിയന്തര പൊലീസ്​ നമ്പറായ 999, സിവിൽ ഡിഫൻസ്​ നമ്പറായ 997 എന്നിവയുടെ പ്രാധാന്യത്തെ കുറിച്ച്​ അവരെ ബോധവത്​കരിക്കണമെന്നും നാസർ ആൽ മസ്​കരി കൂട്ടിച്ചേർത്തു.