ശൈഖ്​ നഹ്​യാനും പ്രിൻസസ്​ റിമക്കും എം.ബി.ആർ സ്​പോർട്​സ്​ അവാർഡ്

ദുബൈ: ​മുഹമ്മദ്​ ബിൻ റാശിദ്​ ആൽ മക്​തൂം ക്രിയേറ്റിവ്​ സ്​പോർട്​സ്​ അവാർഡ്​ പ്രഖ്യാപിച്ചു. യു.എ.ഇ സ്​പോർട്​സ്​ പേർസനാലിറ്റിയായി യു.എ.ഇ സഹിഷ്​ണുതാ കാര്യമന്ത്രി ശൈഖ്​ നഹ്​യാൻ ബിൻ മുബാറക്​ ആൽ നഹ്​യാനെ തെരഞ്ഞെടുത്തു.  അറബ്​ സ്​പോർട്​സ്​ പേഴ്​സനാലിറ്റി പുരസ്​കാരം  സൗദി രാജകുമാരി റിമ ബിൻത്​ ബന്ദർ ബിൻ സുൽതാൻ അൽ സഉൗദിന്​ ആണ്. അവാർഡ്​ ട്രസ്​റ്റ്​ ബോർഡ്​ ചെയർമാൻ മത്താർ അൽ തായറാണ്​ പുരസ്​കാര വിവരങ്ങൾ പ്രഖ്യാപിച്ചത്​. യുവജന^കായികക്ഷേമ ജനറൽ അതോറിറ്റി ചെയർമാൻ എന്ന നിലയിൽ കായിക മേഖലയുടെ വർച്ചക്കു നൽകിയ സംഭാവനകളാണ്​ ശൈഖ്​ നഹ്​യാനെ പുരസ്​കാര അർഹനാക്കിയത്​.  സൗദി സ്​പോർട്​സ്​ ഫെഡറേഷ​​െൻറ ആദ്യ വനിതാ മേധാവിയായ   റിമ ബിൻത്​ ബന്ദർ സ്​കൂളുകളിൽ പെൺകുട്ടികളുടെ കായിക മുന്നേറ്റത്തിന്​ അർപ്പിച്ച സേവനങ്ങളാണ്​ അവാർഡ്​ നേടിക്കൊടുത്തത്​. ഇൻറർനാഷനൽ ക്രിക്കറ്റ്​ അസോസിയേഷനും യൂനിയൻ സൈക്ലിസ്​റ്റ്​ ഇൻറർനാഷനലും മികച്ച അന്താരാഷ്​ട്ര കായിക സംഘടനകൾക്കുള്ള പുരസ്​കാരം കരസ്​ഥമാക്കി. 

ശൈഖ്​ നഹ്​യാൻ ബിൻ മുബാറക്​ ആൽ നഹ്​യാൻ, റിമ ബിൻത്​ ബന്ദർ ബിൻ സുൽതാൻ അൽ സഉൗദ്

 

ഫുട്​ബാൾതാരം ഉമർ അബ്​ദുൽ റഹ്​മാൻ അൽ അമൂദി യു.എ.ഇയുടെ ഒൗട്ട്​സ്​റ്റാൻറിങ്​ അത്​ലറ്റ്​ ആയും ഇബ്രാഹിം യൂസുഫ്​ അൽ മൻസൂരി മികച്ച റഫറിയായും അശ്വവേഗ പരിശീലകൻ സഇൗദ്​ ബിൻ സുറൂർ അൽ ഖാലിദ്​ കോച്ച്​ ആയും യു.എ.ഇ ജിഉ ജിറ്റ്​സു ഫെഡറേഷൻ മികച്ച സംഘടനയായും തെരഞ്ഞെടുക്കപ്പെട്ടു. 
 75 ലക്ഷം ദിർഹമാണ്​ ആകെ പുരസ്​കാര തുക.ജനുവരി 10ന്​ നടക്കുന്ന ചടങ്ങിൽ അവാർഡുകൾ സമ്മാനിക്കും.  
സ്​ത്രീ ശാക്​തീകരണത്തിന്​ ഉൗന്നൽ നൽകുക എന്ന യു.എ.ഇ വൈസ്​ പ്രസിഡൻറും പ്രധാനമന്ത്രിയും ദുബൈ ഭരണാധികാരിയുമായ ശൈഖ്​ മുഹമ്മദ്​ ബിൻ റാശിദ്​ ആൽ മക്​തൂമി​​െൻറ നിർദേശമാണ്​ ഇക്കുറി അവാർഡ്​ നിർണയത്തിന്​ മുഖ്യ പ്രമേയമാക്കിയതെന്ന്​ മത്താർ അൽ തായർ പറഞ്ഞു.  അവാർഡ്​ സെക്രട്ടറി ജനറൽ മൊആസ അൽ മറി, ട്രസ്​റ്റംഗം മുസ്​തഫാ ലർഫാഇ എന്നിവരും അവാർഡ്​ പ്രഖ്യാപന ചടങ്ങിൽ സംബന്ധിച്ചു.