സർക്കാർ സ്​ഥാപനങ്ങളിൽ  പ്രസവാവധി 90 ദിവസം

ദുബൈ: ദുബൈയിലെ സര്‍ക്കാര്‍ സ്​ഥാപനങ്ങളിലെ  ജീവനക്കാരികള്‍ക്ക് 90 ദിവസത്തെ പ്രസവാവധി അനുവദിച്ച് യു.എ.ഇ വൈസ്​ പ്രസിഡൻറും പ്രധാനമന്ത്രിയും ദുബൈ ഭരണാധികാരിയുമായ ശൈഖ് മുഹമ്മദ് ബിൻ റാശിദ് ആൽ മക്തൂം ഉത്തരവായി. പ്രസവ തീയതിക്ക്​ 30 ദിവസം മുമ്പ്​ തന്നെ പ്രസവാവധിയിൽ പ്രവേശിക്കാം. എന്നാൽ, പിന്നീടുള്ള 60 ദിവസം ഇതി​​െൻറ തുടർച്ചയായി എടുത്തിരിക്കണം. 

പ്രസാവവധിയോട് ചേര്‍ത്ത് വാര്‍ഷിക അവധി, വേതനമില്ലാത്ത അവധി എന്നിവ ചേര്‍ത്ത് എടുക്കാനും അനുമതിയുണ്ട്​. എന്നാല്‍, പരമാവധി 120 ദിവസമാണ് ലഭിക്കുക. പ്രസാവനുബന്ധ അവധിക്കാലത്ത് അടിസ്ഥാന ശമ്പളം മാത്രമേ ലഭിക്കൂ. 2016 മാര്‍ച്ച് ഒന്ന് മുതല്‍ മുന്‍കാല പ്രാബല്യത്തോടെയാണ് ഉത്തരവ്.
ഗർഭം 24 ആഴ്ച പൂർത്തിയാകുന്നതിന്​ മുമ്പ്​ ഭ്രൂണം അലസുന്ന സാഹചര്യമുണ്ടായാല്‍ മെഡിക്കല്‍ റിപ്പോര്‍ട്ട് പ്രകാരം മെഡിക്കൽ ലീവ് ലഭിക്കും. 

24 ആഴ്ചകള്‍ക്ക് ശേഷമാണെങ്കില്‍ 60 ദിവസത്തെ പ്രസവാവധി നല്‍കും. ഭിന്നശേഷിയുള്ള കുട്ടി ജനിക്കുന്ന അമ്മമാര്‍ക്ക് ഒരു വര്‍ഷത്തെ പ്രസവാവധി ലഭിക്കും. ഇത് മൂന്ന് വര്‍ഷം വരെ ദീര്‍ഘിപ്പിക്കാം. ഇതിന്​ കുട്ടിയുടെ മെഡിക്കൽ റിപ്പോർട്ട്​ ഹാജരാക്കുകയും സർക്കാർ സ്​ഥാപനത്തിലെ ബന്ധപ്പെട്ട മുതിർന്ന ഉദ്യോഗസ്​ഥ​​െൻറ അനുമതി വാങ്ങുകയും ചെയ്​തിരിക്കണം.

20ല്‍ കൂടുതല്‍ വനിതാ ജീവക്കാരുള്ള സര്‍ക്കാര്‍ സ്ഥാപനങ്ങളില്‍ കുട്ടികളെ പരിപാലിക്കാന്‍ നഴ്സറി ആരംഭിക്കാനും ദുബൈ ഭരണാധികാരി ഉത്തരവിട്ടു. 20ൽ കുറവ്​ വനിതാ ജീവനക്കാരുള്ള രണ്ടോ അതിലധികമോ സ്​ഥാപനങ്ങൾക്ക് സംയുക്​തമായും നഴ്​സറി ആരംഭിക്കാം. നഴ്​സറി സ്​ഥാനിക്കാൻ സ്​ഥലമില്ലാ​ത്ത സ്​ഥാപനങ്ങൾക്ക്​ സമീപത്ത്​ പ്രവർത്തിക്കുന്ന നഴ്​സറിക​ളെ സമീപിക്കാവുന്നതാണ്​.