ദുബൈയിലെ സ്കൂളുകളിൽ മാസ്ക്​ വേണ്ട; ക്ലാസ്​ മുറിയിൽ വേണം

ദുബൈ: ദുബൈയിലെ സ്കൂളുകളിൽ തുറന്ന സ്ഥലങ്ങളിൽ മാസ്​ക്​ നിർബന്ധമില്ലെന്ന്​ നോളജ്​ ആൻഡ്​ ഹ്യൂമൻ ഡെവലപ്​മെന്‍റ്​ അതോറിറ്റി (കെ.എച്ച്​.ഡി.എ) അറിയിച്ചു. യൂനിവേഴ്​സിറ്റികൾക്കും ചൈൽഡ്​ഹുഡ്​ സെന്‍ററുകൾക്കും ഇത്​ ബാധകമാണ്​. അതേസമയം, ക്ലാസ്​ മുറികൾ ഉ​ൾപെടെ അടഞ്ഞ സ്ഥലങ്ങളിൽ മാസ്ക്​ നിർബന്ധമാണ്​.

യു.എ.ഇയിലുടനീളം തുറസായ സ്ഥലങ്ങളിൽ മാസ്ക്​ ഒഴിവാക്കിയതിന്‍റെ ഭാഗമായാണ്​ ദുബൈയിലെ സ്കൂളുകളും ഇത്​ ഏറ്റെടുത്തത്​. കോവിഡ്​ ബാധിതരുമായി അടുത്ത ബന്ധം പുലർത്തുന്നവർ ക്വാറന്‍റീനിൽ കഴിയണമെന്ന നിബന്ധനയും ഒഴിവാക്കി. രോഗലക്ഷണങ്ങളില്ലെങ്കിൽ ക്വാറന്‍റീൻ ആവശ്യമില്ല. ഇവർക്ക്​ ക്ലാസ്​ മുറികളിലെത്താം. പോസിറ്റീവാകുന്നവർ പത്ത്​ ദിവസം ഐസൊലേഷനിൽ കഴിയണം. അതേസമയം, സാമൂഹിക അകലം പാലിക്കൽ തുടരണം. സ്ഥാപനങ്ങൾ സ്ഥിരമായി സാനിറ്റൈസേഷൻ നടത്തണം.