ദുബൈയിൽ മറൈൻ സ്​റ്റേഷൻ വിശ്രമകേന്ദ്രങ്ങൾ നവീകരിക്കുന്നു

ദുബൈ: നഗരത്തിലെ സമുദ്ര ഗാതാഗത സ്​റ്റേഷനുകളിലെ യാത്രക്കാരുടെ വിശ്രമ കേന്ദ്രങ്ങൾ നവീകരിക്കുന്ന പദ്ധതിയുടെ രണ്ടാം ഘട്ടം ആരംഭിച്ചു. അഞ്ച്​ പ്രധാന സ്​റ്റേഷനുകളാണ്​ ഈ ഘട്ടത്തിൽ നവീകരിക്കുന്നതെന്ന്​ റോഡ്​ ഗതാഗത അതോറിറ്റി(ആർ.ടി.എ) അറിയിച്ചു. അൽ ഫഹീദി, ബനിയാസ്​, അൽ സീഫ്​, ശൈഖ്​ സായിദ്​ റോഡ്​, ബ്ലയൂ വാട്ടേഴ്​സ്​ എന്നീ സ്​റ്റേഷനുകളിലെ വിശ്രമ​​കേന്ദ്രങ്ങളാണ്​ പുതുക്കുന്നത്​. യാത്രക്കാർക്ക്​ മികച്ച സേവനം നൽകുന്നതിനുള്ള ശ്രമങ്ങളുടെ ഭാഗമായാണ്​ പദ്ധതി നടപ്പിലാക്കുന്നത്​.

നൂതനമായ എ.സി സംവിധാനം സ്ഥാപിക്കൽ, യാത്രക്കാർക്കും നിശ്​ചയദാർഡ്യ വിഭാഗക്കാർക്കും പ്രത്യേകമായ വിശ്രമ സ്ഥലങ്ങൾ എന്നിവ പദ്ധതിയുടെ ഭാഗമായി സജ്ജീകരിക്കും. അന്താരാഷ്ട്ര തലത്തിലെ നിലവാരമനുസരിച്ചാണ്​ നവീകരണം നടപ്പിലാക്കുന്നത്​. നഗരത്തിന്‍റെ പൈതൃകത്തെയും സംസ്കാരത്തെയും ആഘോഷമാക്കുന്ന രൂപകൽപനയാണ് കേന്ദ്രങ്ങൾക്ക്​ ആസൂത്രണം ചെയ്തിട്ടുള്ളത്​.

ദുബൈയിലെ സമുദ്ര ഗതാഗത രംഗത്തെ അടിസ്ഥാന സൗകര്യങ്ങൾ മെച്ചപ്പെടുത്താനുള്ള പദ്ധതികളുടെ ഭാഗമായാണ്​ സംരംഭമെന്നും, ഇതിലൂടെ സേവനങ്ങളുടെ ഗുണനിലവാരം മെച്ചപ്പെടുത്താൻ ലക്ഷ്യമിടുന്നതായും ആർ.ടി.എയിലെ പബ്ലിക്​ ട്രാൻസ്​പോർട്​ ഏജൻസിയിലെ മറൈൻ ട്രാൻസ്​പോർട്​ വിഭാഗം ഡയറക്ടർ ഖലഫ്​ ബിൽഗുസൂസ്​ അൽ സറൂനി പറഞ്ഞു. മറൈൻ സ്​റ്റേഷനുകൾ മറ്റു പൊതു ഗതാഗത സംവിധാനങ്ങളായ ബസുകൾ, മെട്രോ സ്​റ്റേഷനുകൾ, ട്രാം എന്നിവയുമായി സംയോജിപ്പിച്ചാണുള്ളതെന്നും, ഇത്​ സഞ്ചാരികൾക്കും താമസക്കാർക്കും എളുപ്പത്തിലുള്ള യാത്രക്ക്​ സൗകര്യമൊരുക്കുമെന്നും അദ്ദേഹം കൂട്ടിച്ചേർത്തു. നവീകരിക്കുന്ന സ്​റ്റേഷനുകൾ യാത്രക്കാരുടെ ആവശ്യവും തന്ത്രപ്രധാന പ്രാധാന്യവും കണക്കിലെടുത്താണ്​ തെരഞ്ഞെടുത്തിരിക്കുന്നത്​.