40 പേരുടെ മാര്‍ഗംകളിയുമായി സുറിയാനി പള്ളിയുടെ 40ാം വാർഷികാഘോഷം

ദുബൈ:  40 പേരുടെ മാര്‍ഗംകളി ഒരുക്കി ക്രൈസ്തവദേവാലയത്തി​​െൻറ നാല്‍പതാം വാര്‍ഷികാഘോഷം. ജബല്‍അലി മോര്‍ ഇഗ്നാത്തിയോസ് യാക്കോബായ സുറിയാനി പള്ളിയുടെ വാര്‍ഷികമാണ് വേറിട്ട പരിപാടികളോടെ ആഘോഷിച്ചത്.കേരളീയ ക്രിസ്ത്യന്‍ പാരമ്പര്യത്തി​​െൻറ ഓര്‍മപ്പെടുത്തലുകളുമായാണ് ജബല്‍അലിയിലെ യാക്കോബായ സുറിയാനി പള്ളിയില്‍ വിശ്വാസികള്‍ അണിനിരന്നത്. 

കുരുന്നുകള്‍ വരെ ചട്ടയും മുണ്ടും ചുറ്റി പള്ളിയിലെത്തി. ഘോഷയാത്രയായി പള്ളിക്ക് മുന്നിലെത്തിയായിരുന്നു മാര്‍ഗം കളി. ദുബൈ  പള്ളിയുടെ ചരിത്രം വിവരിക്കുന്ന പരിചമുട്ടുകളി പാട്ടുമായി യുവാക്കളുടെ സംഘവും ചുവടുവെച്ചു. യു.എ.ഇ ഭദ്രാസനാധിപന്‍ ഐസക് മോര്‍ ഒസ്താതിയോസ്, ഇടവക വികാരി ഫാ. എബിന്‍ എബ്രഹാം, ഡീക്കണ്‍ ജോണ്‍ കാട്ടില്‍പറമ്പില്‍ തുടങ്ങിയവർ പരിപാടിയില്‍ പങ്കെടുത്തു. നാല്‍പതാം വാര്‍ഷികത്തി​​െൻറ ഭാഗമായി ഒരു വര്‍ഷം നീണ്ടുനില്‍ക്കുന്ന പരിപാ‌ടികളാണ് ആസൂത്രണം ചെയ്യുന്നത്.