നാ​സ​റി​നി​ത്​ മാ​ര​ത്ത​ൺ മാ​സം

ദു​ബൈ: പൊട്ടിവിടരുന്ന ഓരോ പ്രഭാതവും നാസർ ഹുസൈന്​ വെല്ലുവിളികളുടേതാണ്​. സുബ്​ഹി നമസ്കാരം കഴിഞ്ഞാൽ ദുബൈ വിമാനത്താവളത്തിന്​ സമീപത്തെ അൽ തവാറിലെത്തിയാൽ നാസറിന്‍റെ കാൽപെരുക്കം കേൾക്കാം. ഉദിച്ചുയരുന്ന സൂര്യനൊപ്പം നാസറിന്‍റെ കാലുകൾക്ക്​ കരുത്തും വേഗവും വർധിക്കും. പുണ്യമാസത്തിലും ഈ മലപ്പുറത്തുകാരൻ​ വിശ്രമമില്ലാതെ ഓട്ടം തുടരുകയാണ്​. നോമ്പുനോറ്റ്​ ദിവസവും 21 കിലോമീറ്റർ ഹാഫ്​ മാരത്തൺ ഓടിത്തീർക്കുകയാണ് മേലാറ്റൂർ സ്വദേശിയായ​ നാസർ ഹുസൈൻ.

മാരത്തണിലും മലകയറ്റത്തിലും ഹരം കണ്ടെത്തുന്ന നാസർ ഹുസൈൻ ‘റമദാൻ ചലഞ്ച്​’ എന്ന പേരിലാണ്​ ദിവസവും ഓടുന്നത്​. പ്രഭാത നമസ്കാരത്തിന്​ ശേഷമാണ്​ കൂടുതൽ ദിവസങ്ങളിലും ഓട്ടം. ചില ദിവസങ്ങളിൽ നോമ്പുതുറക്കുന്നതിന്​ മുമ്പായിരിക്കും ഓട്ടം. ഓരോ ദിവസവും പല റൂട്ടുകളാണ്​. ഏകദേശം രണ്ടുമണിക്കൂറോളം സമയമെടുക്കും 21 കിലോമീറ്റർ താണ്ടാൻ. നോമ്പായതിനാൽ വേഗം കുറച്ചാണ്​ ഓടുന്നത്​. പ്രശസ്ത ഫിറ്റ്​നസ്​ ആപ്പായ സ്​ട്രാവ വഴി ഓരോ ദിവസത്തെയും ഓട്ടം കൃത്യമായി അപ്​ഡേറ്റ്​ ചെയ്യുന്നുണ്ട്​. നിർജലീകരണം ഉണ്ടാകാതിരിക്കാൻ ഇടയത്താഴത്തിന് ഒരുപാട്​ വെള്ളം കുടിക്കും. ​അരിഭക്ഷണവും ഇലക്കറികളും പഴവർഗങ്ങളുമാണ്​ കൂടുതലായി കഴിക്കുക. വൈകീട്ട് നോമ്പുതുറക്ക്​ തൊട്ടുമുമ്പ്​ അവസാനിക്കുന്ന രീതിയിലായിരിക്കും ഓട്ടം. ഇതിനുപുറമെ ആഴ്ചയിൽ ഒരുദിവസം മലകയറാനും പോകുന്നുണ്ട്​.

റമദാൻ ആത്​മസംസ്കരണത്തിന്‍റെ മാസമാണെന്നും ശാരീരികവും മാനസികവുമായ സംസ്കരണം അതിന്‍റെ ഭാഗമാണെന്നും അദ്ദേഹം വിശ്വസിക്കുന്നു. അതിനാലാണ്​ ദൈവത്തിലർപ്പിച്ച്​ വെറുംവയറ്റിൽ ഓട്ടം തുടരുന്നത്​. എന്നാൽ, തുടക്കക്കാർ നോമ്പെടുത്ത്​ ഇത്രദൂരം ഓടരുതെന്ന്​ നാസർ ഉപദേശിക്കുന്നു. വെള്ളം വറ്റിയാൽ അത് ശരീരത്തെ ഗുരുതരമായി ബാധിക്കും. തുടക്കത്തിൽ ചെറിയ ദൂരം ഓടുകയും പിന്നീട്​ പരിശീലനത്തിലൂടെ വൻ ദൂരങ്ങൾ താണ്ടാൻ ശ്രമിക്കുകയും ചെയ്യണമെന്നാണ്​ നാസറിന്‍റെ നിർദേശം.

റമദാനിലും വ്യായാമങ്ങൾക്ക്​ വിശ്രമം നൽകേണ്ടതില്ല എന്ന സന്ദേശം പകരുക കൂടിയാണ്​ നാസർ. ഓടാൻ താൽപര്യമുള്ളവർക്ക്​ തനിക്കൊപ്പം ചേരാമെന്നും ആവശ്യമായ ഉപദേശ നിർദേശങ്ങൾ നൽകുമെന്നും നാസർ പറയുന്നു. ദുബൈയിലെ ജ​ലീ​ലി​യ ഫൗ​ണ്ടേ​ഷ​ൻ വ​ഴി കു​ട്ടി​ക​ൾ​ക്ക്​ ചി​കി​ത്സാസ​ഹാ​യ​മെ​ത്തി​ക്കു​ക എ​ന്ന ല​ക്ഷ്യ​ത്തോ​ടെ നാ​സ​ർ ഹു​സൈ​ൻ കഴിഞ്ഞ മാസം മലകയറിയിരുന്നു. ന്യൂ ​ഇ​യ​ർ ച​ല​ഞ്ച്​ വി.1 ​എ​ന്ന്​ പേ​രി​ട്ടി​രി​ക്കു​ന്ന ഈ ​ച​ല​ഞ്ചി​ലൂ​ടെ റാ​സ​ൽ​ഖൈ​മ​യി​ലെ ജ​ബ​ൽ ജെ​യ്​​സ്, ജ​ബ​ൽ യ​ബാ​ന, ജ​ബ​ൽ റ​ഹ​ബ എ​ന്നി​വയാണ്​ താണ്ടിയത്​. ജ​ബ​ൽ ജെ​യ്​​സി​ന്‍റെ താ​ഴ്​​ഭാ​ഗ​മാ​യ വാ​ദി​ബി​ഹി​ൽ​നിന്ന്​ തുടങ്ങിയ യാത്ര 50 കി​ലോ​മീ​റ്റ​റിലേറെ പിന്നിട്ടാണ്​ അവസാനിച്ചത്​. മു​മ്പും യു.​എ.​ഇ​യു​ടെ വി​വി​ധ മ​ല​നി​ര​ക​ൾ കീ​ഴ​ട​ക്കി ശ്ര​ദ്ധേ​യ​നാ​യി​ട്ടു​ണ്ട്​ നാ​സ​ർ ഹു​സൈ​ൻ.