സഹപരിശീലകരായി ഇമറാത്തികൾ സ്​പോർട്​സ്​ ക്ലബുകളിൽ നിർബന്ധം

ദുബൈ: ദുബൈയിലെ സർക്കാറിനു​ കീഴിലുള്ള സ്​പോർട്​സ്​ ക്ലബുകളിലും കമ്പനികളിലും കായിക ടീമുകളുടെ സഹപരിശീലകരായി ഇമറാത്തികളെ നിയമിക്കണമെന്ന്​ ഉത്തരവ്​.ദുബൈ സ്​പോർട്​സ്​ കൗൺസിൽ ചെയർമാൻ ശൈഖ്​ മൻസൂർ ബിൻ മുഹമ്മദ്​ ബിൻ റാശിദ്​ ആൽ മക്തൂമാണ്​ ഉത്തരവ്​ പുറപ്പെടുവിച്ചത്​. സ്വദേശി പൗരന്മാർക്ക്​ കായിക രംഗത്ത്​ കൂടുതൽ അവസരമൊരുക്കുക എന്ന ലക്ഷ്യം മുൻനിർത്തിയാണ്​ തീരുമാനം.

ദേശീയ തലത്തിൽ കൂടുതൽ പരിശീലകരെ വളർത്തിക്കൊണ്ടുവരുക എന്ന ലക്ഷ്യവും ഇതിനുണ്ട്​.സർക്കാറിനു കീഴിലുള്ള എല്ലാ സ്​പോർട്​സ്​ ക്ലബുകളുടെയും പ്രമുഖ ടീമി​െൻറ അസിസ്​റ്റൻറ്​ കോച്ചായാണ്​ ഇവരെ നിയമിക്കേണ്ടത്​. ഈ സീസൺ മുതൽ ഇത്​ പ്രാബല്യത്തിൽ വരുത്തണം. ക്ലബുകൾക്കും സ്​പോർട്​സ്​ കമ്പനികൾക്കും ഇതുമായി ബന്ധപ്പെട്ട നിർദേശം നൽകി.

അടിയന്തരമായി​ നടപ്പാക്കണം. പരിശീലകർക്ക്​ ആവശ്യമായ സൗകര്യമൊരുക്കാനും നിർദേശം നൽകി. ഈ ജോലി ചെയ്യാനുള്ള ഔദ്യോഗിക യോഗ്യത നേടിയവരെയാണ്​ നിയമിക്കേണ്ടത്​. അതോടൊപ്പം പരിശീലകർക്കായി ശിൽപശാലകൾ സംഘടിപ്പിക്കാനും നിർദേശമുണ്ട്​.

ദുബൈയിലെ സർക്കാർ സ്​പോർട്​സ്​ ക്ലബുകളിൽ 54 ശതമാനവും ഇമറാത്തികളാണ്​. 130 പരിശീലകരാണ്​ ആകെയുള്ളത്​. ഇതിൽ 70 പേരും യു.എ.ഇ പൗരന്മാരാണ്​. അടുത്തിടെ 10​ പേർ പ്രോ ലൈസൻസ്​ നേടിയിരുന്നു. ഇവരിൽ ഏഴുപേരും ദുബൈക്ക്​ പുറത്തുള്ള ടീമുകളുടെ പരിശീലകരാണ്​.