കൃഷ്​ണകുമാർ പോയി, വേദനകളില്ലാത്ത ലോകത്തേക്ക്​

ദുബൈ: മനുഷ്യരുടെ വേദനകൾ പരിഗണിക്കാതെ ഇന്ത്യൻ സർക്കാർ പ്രഖ്യാപിച്ച ലോക്​ഡൗണി​ന്​ പ്രവാസലോകത്തുനിന്ന്​ ഒരു രക്​തസാക്ഷി കൂടി. പ്രിയതമനെ ചികിത്സക്കായി നാട്ടിലെത്തിക്കാൻ ജയ​ശ്രീ ടീച്ചറും സാമൂഹിക പ്രവർത്തകരും ചേർന്ന്​ നടത്തിയ ശ്രമങ്ങൾ വിഫലമായി. പത്തനംതിട്ട ചെന്നീർക്കര പുത്തൻപുരയിൽ കൃഷ്ണകുമാർ (55) വേദനയില്ലാത്ത ലോകത്തേക്ക്​ യാത്രയായി. 

നാട്ടിൽ നടത്തിയ ബിസിനസുകൾ പരാജയപ്പെട്ട ഘട്ടത്തിൽ ജീവിതം തിരിച്ചുപിടിക്കാൻ പ്രവാസ​ജീവിതം തെരഞ്ഞെടുത്തതാണ്​ കൃഷ്​ണകുമാർ. ഒര​​ു കമ്പനിയിൽ ഇലക്​ട്രിക്കൽ എൻജിനീയറായി ജോലിയിൽ ​പ്രവേശിച്ചെങ്കിലും സാമ്പത്തികമായ പ്രതിസന്ധികൾ തുടർന്നു. ഫെബ്രുവരി 13ന് ഓഫിസിലേക്ക് പോകുന്നതിനിടെ രക്തസമ്മർദ്ദം വർധിച്ച്​ റോഡിൽ വീണ കൃഷ്ണകുമാർ അബോധാവസ്​ഥയിലായി. 

റാഷിദ്​ ആശുപത്രിയിൽ ചികിത്സയിലായ ഇദ്ദേഹത്തെ പരിചരിക്കാൻ ഭാര്യ ജയശ്രീ ടീച്ചർ നാട്ടിൽ നിന്നെത്തുകയായിരുന്നു. കേരളത്തിലെത്തിച്ച്​ തുടർ ചികിത്സ നടത്തുവാൻ ശ്രമിച്ചെങ്കിലും ലോക്​ഡൗൺ ആ പദ്ധതിയും ​മുടക്കി. അജ്​മാനിലെ ഗൾഫ്​ മെഡിക്കൽ യൂനിവേഴ്​സിറ്റിയിൽ ചികിത്സയിൽ തുടരവെ   വന്ദേഭാരത്​ വിമാനങ്ങളിലൊന്നിൽ നാട്ടിലെത്തിക്കാൻ സാധ്യതകൾ ആരാഞ്ഞെങ്കിലും നടന്നില്ല. 

പിന്നീട്​ സാമൂഹിക പ്രവർത്തകൻ അഡ്വ. ഹാഷിക്​, ഷിബു വർഗീസ്​, ടി.പി. സുധീഷ്​ തുടങ്ങിയവരുടെ നേതൃത്വത്തിൽ ഇദ്ദേഹത്തെ ചാർ​േട്ടഡ്​ വിമാനത്തിൽ കൊണ്ടുപോകാൻ ശ്രമങ്ങൾ നടത്തി വരുന്നതിനിടെ തിങ്കളാഴ്​ച മരണം സംഭവിക്കുകയായിരുന്നു. രണ്ട്​ പെൺമക്കളുണ്ട്​.

മൃതദേഹത്തി​​െൻറ നടപടിക്രമങ്ങൾ കൃഷ്​ണകുമാർ പഠിച്ച പന്തളം പോളിടെക്​നിക്കിലെ പൂർവവിദ്യാർഥികളുടെ നേതൃത്വത്തിൽ നടക്കുന്നു. ആരോഗ്യ സുരക്ഷ അനുമതി ലഭിച്ചാൽ മൃതദേഹം നാട്ടിലെത്തിച്ച്​ സംസ്​കരിക്കുമെന്ന്​ സുഹൃത്തുക്കൾ അറിയിച്ചു.