സെക്യൂരിറ്റി ജോലി വാഗ്​ദാനം ചെയ്​ത്​ തട്ടിപ്പ്​; മലയാളി യുവാക്കൾ ദുബൈയിൽ കുടുങ്ങി

ദുബൈ: ദുബൈയിൽ ​സെക്യൂരിറ്റി ജോലി നൽകാമെന്ന്​ വാഗ്​ദാനം നൽകി വൻ തട്ടിപ്പ്​. മലയാളിയുടെ നേതൃത്വത്തിൽ നടന്ന തട്ടിപ്പിനിരയായ 18 മലയാളികൾ ഉൾപെടെ 40ഓളം യുവാക്കൾ ദുബൈയിൽ കുടുങ്ങി. വിസിറ്റിങ്​ വിസയുടെ കാലാവധി കഴിഞ്ഞതിനാൽ വൻ തുക പിഴ അടക്കാതെ നാട്ടിലേക്ക്​ മടങ്ങാൻ പോലും കഴിയാത്ത അവസ്​ഥയിലാണിവർ. രണ്ട്​ മാസം ജോലി ചെയ്​തെങ്കിലും ഒരു ദിർഹം പോലും ശമ്പളം ലഭിച്ചിട്ടില്ല. കാസർകോട്​ മുതൽ തിരുവനന്തപുരം വരെ ജില്ലകളിലുള്ളവർ ഇക്കൂട്ടത്തിലുണ്ട്​. ദുബൈ ഇന്ത്യൻ കോൺസുലേറ്റിൽ പരാതി നൽകി.

കോഴിക്കോട്​ താമസിക്കുന്ന നിലമ്പൂർ സ്വദേശി ശരീഫാണ്​ തങ്ങളെ ദുബൈയിലെത്തിച്ചതെന്ന്​ ഇവർ പറഞ്ഞു. ജോലി വാഗ്​ദാനം ചെയ്​ത്​ സാമൂഹിക മാധ്യമങ്ങൾ വഴി​ ലഭിച്ച അറിയിപ്പനുസരിച്ചാണ്​ ശരീഫുമായി ബന്ധപ്പെട്ടത്​. നാട്ടിൽ വെച്ച് ശരീഫി​െൻറ അക്കൗണ്ടിലേക്ക്​​ 50000 രൂപ നിക്ഷേപിച്ചു. ദുബൈയിൽ വിമാനമിറങ്ങിയ ഉടൻ 2500 ദിർഹം (50000 രൂപ) നൽകി. ഏപ്രിൽ ഒന്നിനാണ്​ ദുബൈയിൽ എത്തിയത്​. സെക്യൂരിറ്റി ജീവനക്കാരെ വിവിധയിടങ്ങളിൽ നിയോഗിക്കുന്ന എൻ.ക്യൂഎസ്​.എസ്​ എന്ന സ്​ഥാപനത്തിന്​ കീഴിലായിരുന്നു ജോലി. പാകിസ്​താനികളായിരുന്നു കമ്പനി ഉടമകൾ. ഏപ്രിൽ മൂന്നിന്​ ഒപ്പുവെച്ചകരാർ പ്രകാരം​ 1800 ദിർഹം (36,000 രൂപ) ശമ്പളവും താമസവും നൽകാമെന്നായിരുന്നു വാഗ്​ദാനം​. സെക്യൂരിറ്റി ഗാർഡിന്​ സർക്കാർ നൽകുന്ന സിറ കാർഡ്​ കിട്ടിയാൽ 2260 ദിർഹം (45,000 രൂപ) ശമ്പളം നൽകാമെന്നും പറഞ്ഞു. പാം ജുമൈറയി​ൽ നിർമാണം നടക്കുന്ന ഹോട്ടലി​െൻറ സെക്യൂരിറ്റി ഗാർഡായി പല ഷിഫ്​റ്റിൽ​ ഇവരെ നിയോഗിച്ചു​. എന്നാൽ, രണ്ട്​ മാസമായിട്ടും ശമ്പളം ലഭിച്ചില്ല. ജബൽ അലി 3യിൽ രണ്ട്​ റൂമിലായി 42 പേർ താമസിക്കുന്നു. കമ്പനി വാടക കൊടുക്കാത്തതിനാൽ ഉടൻ ഇവിടെ നിന്നിറങ്ങേണ്ടി വരും. കൈയിൽ പണമില്ലാത്തതിനാൽ ഭക്ഷണത്തിന്​ പോലും വകയില്ലാത്ത അവസ്​ഥയിലാണ്​. പാകിസ്​താനികൾ മുങ്ങിയെന്നും കമ്പനി ഏറ്റെടുക്കുമെന്നും ശമ്പളം നൽകുമെന്നുമായിരുന്നു ശരീഫ്​ ഇവരോട്​ പറഞ്ഞിരുന്നത്​. എന്നാൽ, കാത്തിരുന്നിട്ടും നടപടിയുണ്ടാകാ​ത്തതിനെ തുടർന്ന്​ കെ.എം.സി.സി ഓഫിസിനെ സമീപിച്ചു. അവിടെ നിന്നാണ്​ കോൺസുലേറ്റിലെത്തി പരാതി നൽകിയത്​.

നാല്​ പേർ ഒഴികെ എല്ലാവർക്കും ഒരു മാസത്തെ സന്ദർശക വിസയാണ്​ എടുത്തിരുന്നത്​. ഇവരുടെ വിസ കാലാവധി കഴിഞ്ഞു. നാട്ടിലേക്ക്​ മടങ്ങണമെങ്കിൽ പോലും വൻ തുക പിഴ അടക്കേണ്ടി വരും. തങ്ങൾ ​കമ്പനിയിൽ ജോലിക്ക്​ പ്രവേശിക്കുന്നതായി വീഡിയോ എടുത്ത്​ നാട്ടിലേക്ക്​ അയച്ച്​ കൂടുതൽ തട്ടിപ്പിന്​ ​ശ്രമം നടക്കുന്നുണ്ടെന്നും യുവാക്കൾ ആരോപിച്ചു. 100 പേരെ കൂടി വേണമെന്നാവശ്യപ്പെട്ടാണ്​ സാമൂഹിക മാധ്യമങ്ങളിൽ പോസ്​റ്റ്​ ചെയ്​തത്​. യു.എ.ഇയിലേക്ക്​ യാത്രവിലക്ക്​ വന്നില്ലായിരുന്നെങ്കിൽ കൂടുതൽ പേർ തട്ടിപ്പിനിരയായി യു.എ.ഇയിൽ എത്തുമായിരുന്നുവെന്നും യുവാക്കൾ പറഞ്ഞു.

അതേസമയം, യുവാക്കൾ തട്ടിപ്പിനിരയായി എന്നത്​ ശരിയാണെന്നും വിശ്വസിച്ചവർ തന്നെയും ചതിച്ചുവെന്നും ശരീഫ്​ പറഞ്ഞു. ഇവരുടെ ജോലിയുടെ സബ്​ കോൺ​ട്രാക്​ട്​ മറ്റൊരു സ്​ഥാപനത്തിന്​ കൊടുത്തിരുന്നു. അവർ പണം നൽകാത്തതാണ്​ പ്രശ്​നത്തിന്​ കാരണമെന്നും ശരീഫ്​ പറഞ്ഞു.