ഇന്‍റർനാഷനൽ ഫോട്ടോഗ്രഫി പുരസ്​കാരത്തിൽ മലയാളിത്തിളക്കം

ദുബൈ: യു.എ.ഇയുടെ 50ാം വാർഷികത്തോടനുബന്ധിച്ച്​ ​ഗ്ലോബൽ വില്ലേജ്​ ഏർപ്പെടുത്തിയ ഹംദാൻ ബിൻ മുഹമ്മദ്​ ബിൻ റാശിദ്​ ആൽ മക്​തൂം ഇന്‍റർനാഷനൽ ഫോട്ടോഗ്രഫി അവാർഡിൽ (ഹിപ) മലയാളിത്തിളക്കം. ലക്ഷക്കണക്കിന്​ രൂപ സമ്മാനത്തുകയുള്ള മത്സരത്തിലെ രണ്ടാം സ്ഥാനവും മൂന്നാം സ്ഥാനവും മലയാളികൾ സ്വന്തമാക്കി. എറണാകുളം നോർത്ത്​ പറവൂർ സ്വദേശിയും സംവിധായകൻ ബാലചന്ദ്ര മേനോ‍െൻറ മകനുമായ അഖിൽ വിനായക്​ മേനോനാണ്​ 26,000 ദിർഹമും (ഏകദേശം അഞ്ച്​ ലക്ഷം രൂപ) സിൽവർ ട്രോഫിയും അടങ്ങിയ രണ്ടാം സ്ഥാനം നേടിയത്​. കൊല്ലത്ത്​ താമസിക്കുന്ന ചെന്നൈ സ്വദേശി സുൽഫിക്കർ അഹ്​മദ് മൂന്നാം സ്ഥാനം നേടി.​ 26,000 ദിർഹമും ഗ്ലാസ്​ ട്രോഫിയുമാണ്​ സമ്മാനം. 50,000 ദിർഹമും (പത്ത്​ ലക്ഷം രൂപ) സ്വർണ ട്രോഫിയും അടങ്ങുന്ന ഒന്നാം സ്ഥാനം സിറിയക്കാരൻ ഇമാദദ്ദീൻ അലീദ്ദീൻ സ്വന്തമാക്കി. ഗ്ലോബൽ വില്ലേജിലെ പ്രധാന വേദിയിൽ നടന്ന ചടങ്ങിൽ മൂവർക്കും സമ്മാനങ്ങൾ കൈമാറി.

2900 ചിത്രങ്ങളിൽനിന്നാണ്​ ഇവരുടെ ചിത്രങ്ങൾ തിരഞ്ഞെടുത്തത്​. വൈൽഡ്​ ലൈഫ്​ ഫോട്ടോഗ്രഫറാണ്​​​ അഖിൽ. ദുബൈയിൽ ഐ.ടി മാനേജറായി ജോലി ചെയ്യുന്ന അഖിൽ ഭാര്യയുടെ പ്രോത്സാഹനമാണ്​ ത‍െൻറ അവാർഡ്​ നേട്ടത്തിന്​ പിന്നിലെന്ന്​ പറഞ്ഞു. ഗ്ലോബൽ വില്ലേജിലെ പ്രധാന വേദിയിൽ നടന്ന പരിപാടിയുടെ ചിത്രമാണ്​ പുരസ്കാരത്തിന്​ അർഹമായത്​.

ദുബൈയിൽ ഫ്രീലാൻസ്​ ഫോട്ടോഗ്രാഫറാണ്​ സുൽഫിക്കർ. ഖിസൈസിൽ സ്വന്തമായി ഫോ​ട്ടോഗ്രഫി സ്​ഥാപനം നടത്തുന്നു. ​ഗ്ലോബൽ വില്ലേജി‍െൻറ പുൽത്തകിടിയിൽ വിശ്രമിക്കുന്ന പിതാവി‍െൻറയും രണ്ട്​ കുട്ടികളുടെയും ചിത്രമാണ്​ പുരസ്കാരം നേടിയത്​. അറബി വേഷത്തിലിരിക്കുന്ന ഇവരുടെ ബാക്ക്​ഗ്രൗണ്ടായി ഗ്ലോബൽ വില്ലേജിലെ യു.എ.ഇ പവലിയനും കാണാം.

ഹിപ സെക്രട്ടറി ജനറൽ അലി ബിൻ താലിത്​ അൽ ഹുമൈരി, ഗ്ലോബൽ വില്ലേജ്​ സി.ഇ.ഒ ബാദർ അൻവാഹി എന്നിവർ ചേർന്ന്​ പുരസ്കാരങ്ങൾ കൈമാറി.