40 ലക്ഷം രൂപ മുടക്ക്​​; വിലക്കിനിടയിലും മലയാളി കുടുംബം സ്വകാര്യ ജെറ്റിൽ ദുബൈയിൽ

ദ​ുബൈ: യാത്രാവിലക്ക്​ തുടങ്ങിയ ശേഷം കേരളത്തിൽ നിന്നുള്ള ആദ്യ സ്വകാര്യ ജെറ്റിൽ യാത്രക്കാർ യു.എ.ഇയിലെത്തി. പാലക്കാട്​ സ്വദേശിയും ബിസിനസുകാരനുമായ പി.ഡി. ശ്യാമള​െൻറ കുടുംബവും ഓഫിസ്​ ജീവനക്കാരും അടങ്ങിയ 13 അംഗ സംഘമാണ്​ ദുബൈ അൽ മക്​തൂം അന്താരാഷ്​ട്ര വിമാനത്താവളത്തിൽ ഇറങ്ങിയത്​. രണ്ട്​ ലക്ഷം ദിർഹം (40 ലക്ഷം രൂപ) മുടക്കിയാണ്​ ഇവർ സ്വകാര്യ ജെറ്റിൽ യാത്ര ചെയ്​തത്​.

യാത്രാ വിലക്കുണ്ടെങ്കിലും ബിസിനസുകാർക്ക്​ ചെറുവിമാനങ്ങളിൽ യു.എ.ഇയിൽ എത്തുന്നതിന്​ തടസമില്ല. എന്നാൽ, ദുബൈ സിവിൽ ​ഏവിയേഷ​െൻറയും ഇന്ത്യൻ അധികൃതരുടെയും അനുമതി വേണമെന്ന്​ മാത്രം. ഈ സൗകര്യം ഉപയോഗിച്ചാണ്​ കൊച്ചി വിമാനത്താവളത്തിൽ നിന്ന്​ ഇവർ പുറപ്പെട്ടത്​. ദുബൈ കേന്ദ്രീകരിച്ച്​ പ്രവർത്തിക്കുന്ന സ്​മാർട്​ ട്രാവൽസാണ്​ വിമാനം ചാർട്ടർ ചെയ്​തത്​.

മാർച്ച്​ 15നാണ്​ മകൾ അഞ്​ജു​െൻറ വിവാഹത്തിനായി ശ്യാമളനും കുടുംബവും ജീവനക്കാരും നാട്ടിലെതിയത്​.​ ഏപ്രിൽ 25ന്​ മടങ്ങിവരാനായിരുന്നു പദ്ധതി. എന്നാൽ, ഇതിന്​ തൊട്ടുമുൻപ്​ യാത്ര വിലക്കേർപെടുത്തി. ഇതോടെ നാട്ടിൽ കുടുങ്ങിയ ഇവർ എങ്ങിനെ മടങ്ങിയെത്തണമെന്ന ചിന്തയിലായി. ഇതിനിടയിലാണ്​ സ്വകാര്യ ജെറ്റുകൾക്ക്​ അനുമതി നൽകുന്ന വിവരം അറിഞ്ഞത്​. യു.എ.ഇ കേന്ദ്രീകരിച്ചുള്ള ബിസിനസായതിനാൽ എങ്ങിനെയും മടങ്ങിയെത്തണമെന്ന ആഗ്രഹത്തെ തുടർന്നാണ്​ ജെറ്റിനായി ശ്രമിച്ചത്​. ഇത്​ വിജയിക്കുകയായിരുന്നു. ശ്യാമളൻ, ഭാര്യ, കഴിഞ്ഞ ദിവസം വിവാഹം കഴിഞ്ഞ മകൾ അഞ്​ജു, മരുമകൻ ശിവ പ്രസാദ്​, മാതാപിതാക്കൾ, ഭാര്യയുടെ മാതാപിതാക്കൾ, സഹോദരി, നാല്​ ജീവനക്കാർ എന്നിവരടങ്ങിയ സംഘമാണ്​ ദുബൈയിൽ എത്തിയത്​. ഷാർജ ആസ്​ഥാനമായ അൽ റാസ്​ ഗ്രൂപ്പി​െൻറ എം.ഡിയാണ്​ ശ്യാമളൻ. നാല്​ പതിറ്റാണ്ടായി യു.എ.ഇയിലുണ്ട്​.

നാട്ടിൽ നിന്ന്​ 48 മണിക്കൂറിനുള്ളിൽ നടത്തിയ കോവിഡ്​ ടെസ്​റ്റ്​ നിർബന്ധമാണ്​. ഇവിടെ എത്തിയ ശേഷം വിമാനത്താവളത്തിലും നാലാം ദിവസവും എട്ടാം ദിവസവും പരിശോധന നടത്തണം. പത്ത്​ ദിവസം ഹോം ക്വാറൻറീനും നിർബന്ധമാണ്​. ഇന്ത്യയിൽ കുടുങ്ങിയ നിരവധിയാളുകളാണ്​ സ്വകാര്യ ജെറ്റിൽ യു.എ.ഇയിൽ എത്താൻ കാത്തിരിക്കുന്നതെന്നും കഴിയുന്നത്ര വിമാനങ്ങൾ ഒരുക്കാൻ ശ്രമിക്കുമെന്നും സ്​മാർട്​ ട്രാവൽസ്​ എം.ഡി അഫി അഹ്​മദ്​ പറഞ്ഞു. സുരക്ഷിതത്വം കണക്കിലെടുത്ത്​ പ്രായമായ രക്ഷിതാക്കളെ യു.എ.ഇയിൽ എത്തിക്കാൻ​ ആഗ്രഹിക്കുന്നവരുണ്ട്​. ഇത്തരം ആവശ്യവുമായി നിരവധിപേർ വിളിക്കുന്നുണ്ടെന്നും അദ്ദേഹം കൂട്ടിചേർത്തു.