‘മധുര ഓർമകളു’മായി വേള്‍ഡ് മലയാളി  കൗൺസിൽ വാർഷികാഘോഷം ഇന്ന് 

അബൂദബി: വേള്‍ഡ് മലയാളി കൗൺസിൽ അബൂദബി ചാപ്റ്റര്‍ വാര്‍ഷികാഘോഷ പരിപാടി ‘മധുര ഓർമകള്‍’ എന്ന പേരിൽ വ്യാഴാഴ്ച അബൂദബി ആംഡ് ഫോഴ്‌സ് ഓഫിസേഴ്‌സ് ക്ലബ് അല്‍ ജാഹിലിയ തിയറ്ററില്‍ നടക്കും. രാത്രി 7.30നാണ്​ പരിപാടി ആരംഭിക്കുക. പരിപാടിയിൽ മലയാള സിനിമയിലെ പഴയകാല നായിക^നായകന്മാരായ ശ്രീലത, സീമ, വിധുബാല, മധു, രവികുമാര്‍ എന്നിവരെ ലൈഫ് ടൈം അച്ചീവ്‌മ​​െൻറ്​ പുരസ്‌കാരം നല്‍കി ആദരിക്കും. മലയാള സിനിമ^സീരിയല്‍ രംഗങ്ങളില്‍ നിന്നുള്ള 12 കലാകാരന്മാര്‍ ഉൾക്കൊള്ളുന്ന സംഘം നൃത്തം, സംഗീതം, സ്കിറ്റ്​, മിമി​ക്രി തുടങ്ങിയ പരിപാടികള്‍ അവതരിപ്പിക്കും.

പഴയ തലമുറയോട് പുതു തലമുറ കാണിക്കുന്ന നിഷേധാത്മക മനോഭാവം മാറ്റുക, വൃദ്ധസദനങ്ങള്‍ പെരുകുന്ന സാമൂഹികാവസ്​ഥ ഇല്ലാതാക്കുക എന്നീ ആശയങ്ങളിലാണ് പരിപാടി സംഘടിപ്പിക്കുന്നതെന്ന് വേള്‍ഡ് മലയാളി കൗൺസിൽ അബൂദബി ചാപ്റ്റര്‍ ഭാരവാഹികള്‍ വാർത്താസമ്മേളനത്തില്‍ പറഞ്ഞു. സിനിമയിൽ എന്നും യുവാക്കളായിരുന്നു സജീവമെന്നും പഴയ ചലച്ചിത്ര പ്രവർത്തകരിൽനിന്നുള്ള പാഠങ്ങൾ ഉൾക്കൊണ്ട്​ യുവാക്കൾ ഇന്ന്​ മലയാള ചലച്ചിത്രത്തെ കൂടുതൽ സജീവമാക്കുന്നുണ്ടെന്നും നടൻ മധു അഭിപ്രായപ്പെട്ടു. സിനിമ പുരുഷന്മാരെ കൊണ്ടും സീരിയൽ സ്​ത്രീകളെ കൊണ്ടും നിറഞ്ഞുവെന്ന്​ നടി ശ്രീലത പറഞ്ഞു.

 വേള്‍ഡ് മലയാളി കൗൺസിൽ അബൂദബി ചാപ്റ്റര്‍ പ്രസിഡൻറ്​ എം.സി. വര്‍ഗീസ്, ജനറല്‍ സെക്രട്ടറി പ്രോമിത്യൂസ് ജോർജ്​, വൈസ് ചെയര്‍മാന്‍ ബഷീര്‍, ജോയിൻറ്​ സെക്രട്ടറി ജോണ്‍ ക്രിസ്​റ്റഫര്‍, ട്രഷറര്‍ മൊയ്തീന്‍ അബ്​ദുല്‍ അസീസ്,  മിഡിലീസ്​റ്റ്​ പ്രസിഡൻറ്​ വി.ജെ. തോമസ് എന്നിവരും വാർത്താസമ്മേളനത്തിൽ പങ്കെടുത്തു.