പ്രതിസന്ധി താൽകാലികം; ഇൗ കാലവും കടന്നുപോകും -എം.എ. യൂസുഫലി

​ദുബൈ: കോവിഡ്​ 19 മൂലമുണ്ടായ പ്രതിസന്ധി താൽകാലികമാണെന്നും ആത്​മവിശ്വാസത്തോടെ മുന്നോട്ടുപോകണമെന്നും ലുലു ഗ്രൂപ്പ്​ ചെയർമാനും നോർക്ക വൈസ്​ ചെയർമാനുമായ എം.എ. യൂസുഫലി. യു.എ.ഇയിലെ ഇന്ത്യൻ മാധ്യമ പ്രവർത്തകരുമായി റമദാൻ ഒാൺലൈൻ മീഡിയാ മജ്​ലിസിൽ സംസാരിക്കുകയായിരുന്നു അദ്ദേഹം. 

ഗൾഫ്​ നാടുകളെ സംബന്ധിച്ചിടത്തോളം ഇത്തരം പ്രതിസന്ധി ആദ്യ സംഭവമല്ല. ഗൾഫ്​ യുദ്ധവും സാമ്പത്തിക മാന്ദ്യവും ഇന്ധന വിലയിടിവും മുമ്പും ഗൾഫ്​ രാജ്യങ്ങളെ പ്രതിസന്ധിയിലാക്കിയിട്ടുണ്ട്​. അതിൽ നിന്നെല്ലാം ഉയർത്തെഴുന്നേറ്റ ഗൾഫ്​ രാജ്യങ്ങൾ ഇൗ പ്രതിസന്ധിയെയും വൈകാതെ മറികടക്കും. ആത്​മവിശ്വാസവും പ്രതീക്ഷയും പ്രാർഥനയും മുറു​കെപ്പിടിച്ച്​ മുന്നോട്ടുപോകേണ്ട സമയമാണ്​. 

ഭക്ഷണത്തിനും മരുന്നിനും യാതൊരു കുറവുമുണ്ടാവില്ല എന്ന്​ യു.എ.ഇയിലെ ഭരണാധികാരികൾ ആദ്യമേ വ്യക്​തമാക്കിയിരുന്നു. നി​ർദേശങ്ങൾക്കനുസൃതമായി അടുത്ത 9-12 മാസത്തേക്കുള്ള ഭക്ഷ്യവിഭവങ്ങൾ ഞങ്ങളും മറ്റ്​ റീ​െട്ടയിൽ^ഭക്ഷമേഖലാ സംരംഭകരും സംഭരിച്ചിട്ടുണ്ട്​.  ഇനിയും സ്​റ്റോക്ക്​ വർധിപ്പിക്കാനുള്ള നടപടികളുമായി മുന്നോട്ടുപോകുന്നു. അടുത്ത ദിവസങ്ങളിലായി 12 പ്രത്യേക വിമാനങ്ങൾ കൂടി ഭക്ഷ്യസാധനങ്ങളുമായി എത്തും. 

ചെറുകിട-വൻകിട വ്യവസായികളും തൊഴിലാളികളുമെല്ലാം പ്രതിസന്ധി നേരിടുന്നുണ്ട്​. എങ്കിലും ഞങ്ങളെ വിശ്വസിക്കുന്ന ജീവനക്കാരുടെ കുടുംബങ്ങളെ പട്ടിണിയിലേക്ക്​ തള്ളിവിടുന്ന നിലപാട്​ സ്വീകരിക്കില്ല. അവരുടെ ശമ്പളം മുടങ്ങാതെ ശ്രദ്ധിക്കുന്നുണ്ട്.  കോവിഡിന്​ ഉടൻ മരുന്ന്​ കണ്ട്​ പിടിക്കുമെന്നാണ്​ പ്രതീക്ഷ. അതുകഴിഞ്ഞാൽ ഇരട്ടി ഉൗർജത്തോടെ ലോകം ഉയർത്തെഴുന്നേൽക്കും. 
കൊറോണയോടൊപ്പം ജീവിക്കേണ്ടി വന്നാൽ അതിനു വേണ്ടിയുള്ള തയാറെടുപ്പുകളും നടത്തണം. കേന്ദ്ര^കേരള സർക്കാറുകൾ അവരുടെ പരിമിതികൾക്കുള്ളിൽനിന്ന്​ നന്നായി പ്രവർത്തിക്കുന്നുണ്ട്​.

പൗരൻമാരെ​േന്നാ പ്രവാസികളെന്നോ വ്യത്യാസമില്ലാതെ എല്ലാവരെയും ചേർത്ത്​ പിടിക്കുന്നവരാണ്​ ​യു.എ.ഇയിലെ ഭരണാധികാരികൾ. ഒരു കോടി ഭക്ഷണപ്പൊതികളുടെ പദ്ധതി ഒന്നര കോടിയും കവിഞ്ഞത്​ ഇതിന്​ ഉദാഹരണമാണ്​. ലോകം മുഴുവൻ പ്രതിസന്ധിയിലാണ്​. ഏറ്റവും മികച്ച ആരോഗ്യ സംവിധാനമുണ്ടെന്ന്​ കരുതിയ അമേരിക്കയും ബ്രിട്ടനും ജർമനിയുമെല്ലാം കോവിഡിന്​ മുന്നിൽ പിടിച്ചുനിൽക്കാനാവാതെ ബുദ്ധിമുട്ടിലാണ്​. കേരളം വ്യവസായ പരമായും വിദ്യാഭ്യാസ പരമായും ഇനിയും വി​കസിക്കേണ്ടതുണ്ട്​. കൺസ്യൂമർ സ്​റ്റേറ്റ്​ എന്ന ലേബലിൽനിന്ന്​ മാറി സ്വയം പര്യാപ്​തരാകണം. ഇത്​ സർക്കാറി​​െൻറ മാത്രം ഉത്തരവാദിത്വമല്ല. 

സ്വകാര്യ സംരംഭകരും ഇത്തരം നിക്ഷേപങ്ങൾ നടത്തണം. എന്നാൽ, നിക്ഷേപകരെ ആട്ടിയോടിക്കുന്ന സമീപനം കേരളത്തിലുള്ളവരും ഉപേക്ഷിക്കണം. തളർന്നുപോകേണ്ട സമയമല്ലെന്നും ഇൗ കാലവും കടന്നുപോകുമെന്നും യൂസുഫലി പറഞ്ഞു. യു.എ.ഇയിലെ  പ്രിൻറ്​-വിഷ്വൽ, റേഡിയോ, ഒാൺലൈൻ മാധ്യമ പ്രവർത്തകർ മജ്​ലിസിൽ ആശയവിനിമയം നടത്തി.. ലുലു ഗ്രൂപ്പ്​ ചീഫ്​ കമ്യൂണിക്കേഷൻസ്​ ഒാഫിസർ വി. നന്ദകുമാർ മോഡറേറ്ററായിരുന്നു.