നീലക്കടലായി​ ലുലു വാക്കത്തോൺ

ദുബൈ: സുസ്ഥിര സന്ദേശം പകർന്ന്​ ലുലു ഗ്രൂപ്പ്​ സംഘടിപ്പിച്ച കൂട്ട നടത്തം നീലക്കടലായി മാറി. ലുലു സമ്മാനിച്ച നീല ജഴ്​സിയണിഞ്ഞ്​ വാക്കത്തോണിൽ അണിനിരന്നത്​​ 11,000 പേർ. ദുബൈ സഫ പാർക്കിലും അൽഐനിലെ കുവൈത്താത്തിലുമായിരുന്നു പരിപാടി. വിവിധ സർക്കാർ ഏജൻസികളുടെ സഹകരണത്തോടെ സംഘടിപ്പിച്ച വാക്കത്തോണിൽ പ​ങ്കെടുക്കാൻ പുലർച്ച മുതൽ ജനങ്ങൾ ഒഴുകിയെത്തിയിരുന്നു.

നടനും മോഡലും ഫിറ്റ്​നസ്​ വിദഗ്ദനുമായ ദിനോ മോറിയ മുഖ്യാതിഥിയായി. 2023നെ സുസ്ഥിര വര്‍ഷമായി പ്രഖ്യാപിച്ച യു.എ.ഇ. പ്രസിഡന്‍റ് ശൈഖ് മുഹമ്മദ് ബിന്‍ സായിദ് ആല്‍ നഹ്​യാന്‍റെ കാഴ്ചപ്പാടിന് പിന്തുണ അറിയിച്ചാണ് വാക്കത്തോൺ സംഘടിപ്പിച്ചത്​.

രാവിലെ എട്ട്​ മണിക്കായിരുന്നു ഫ്ലാഗ്​ ഓഫ്​. യോഗ സെഷന്‍, ഫിറ്റ്‌നസ് ക്ലാസ്, സുംബ നൃത്തം തുടങ്ങിയ പരിപാടികളും സംഘടിപ്പിച്ചിരുന്നു. കാന്‍സര്‍ സ്‌ക്രീനിംഗ്, ആരോഗ്യ പരിശോധനകള്‍, ഉല്‍പ്പന്ന സാമ്പിളുകള്‍, ഗിഫ്റ്റ് ഹാമ്പറുകള്‍, റിഫ്രഷ്മെന്‍റ്​, ആഫ്രിക്കന്‍ ഡ്രമ്മര്‍മാര്‍, ഇന്ത്യന്‍-റഷ്യൻ നൃത്തങ്ങള്‍ തുടങ്ങി വിവിധ പ്രവര്‍ത്തനങ്ങളും നടന്നു.

കോവിഡിന്‍റെ ഇടവേളക്ക്​ ശേഷം ​വാക്കത്തോൺ വീണ്ടും സംഘടിപ്പിക്കാൻ കഴിഞ്ഞതിൽ സന്തോഷമുണ്ടെന്നും പ്രതീക്ഷിച്ചതിനേക്കാൾ മികച്ച പ്രതികരണമാണ്​ ലഭിച്ചതെന്നും ലുലു ഗ്രൂപ്പ്​ ഡയറക്ടർ എം.എ. സലീം പറഞ്ഞു. യു.എ.ഇ നിവാസികൾ കൂടുതൽ ഫിറ്റ്​നസ്​ പ്രവർത്തനങ്ങളിൽ ഏർപ്പെടണമെന്നും സുസ്ഥിരതയെ ​​പ്രോത്സാഹിപ്പിക്കണമെന്നും അദ്ദേഹം ആഹ്വാനം ചെയ്തു.