ലുലു ഉൽപ്പന്നങ്ങൾ ഇനി ആമസോൺ വഴിയും; ആദ്യ ഘട്ടം ദുബൈയിൽ

അബൂദബി: ലുലു ഹൈപ്പർമാർക്കറ്റിൽ നിന്നുള്ള ഗ്രോസറി, ഫ്രഷ് ഉല്‍പ്പന്നങ്ങള്‍ ഇനി മുതൽ ആമസോൺ വഴിയും. ഇത്​ സംബന്ധിച്ച കരാറിൽ അബൂദബി എക്കണോമിക് ഡിപ്പാര്‍ട്ട്‌മെന്‍റ്​ ചെയര്‍മാന്‍ മുഹമ്മദ് അലി അല്‍ ഷോറഫയുടെ സന്നിധ്യത്തില്‍ ലുലു ഗ്രൂപ്പ് ചെയര്‍മാന്‍ എം.എ. യൂസഫലിയും ആമസോണ്‍ മിഡില്‍ ഈസ്റ്റ വൈസ് പ്രസിഡന്‍റ് റൊണാള്‍ഡോ മോചവറും ഒപ്പുവെച്ചു. യു.എ.ഇയിലാണ്​ ആദ്യ ഘട്ടത്തിൽ നടപ്പാക്കുന്നതെങ്കിലും രണ്ടാം ഘട്ടത്തില്‍ മറ്റ് ജി.സി.സി രാജ്യങ്ങള്‍, ഈജിപ്ത് എന്നിവിടങ്ങളിലേക്കും ഇത്തരം സഹകരണം വ്യാപിപ്പിക്കാനാണ്​ ലക്ഷ്യമിടുന്നത്​.

ആദ്യഘട്ടത്തില്‍ ദുബൈ മറീന, ബര്‍ഷ, പാം ജുമേറ, അറേബ്യന്‍ റാഞ്ചസ് എന്നീ പ്രദേശങ്ങളിലാണ് വിതരണ ശൃംഖല ലഭ്യമാകുന്നത്. പിന്നീട് യു.എ.ഇയിലെ എല്ലാ നഗരങ്ങളിലേക്കും വ്യാപിപ്പിക്കും. സ്വകാര്യ-സംയുക്ത സംരംഭങ്ങള്‍ യു.എ.ഇ. വാണിജ്യ മേഖലയെ കൂടുതല്‍ ശക്തിപ്പെടുത്തുന്നതാണെന്ന് അബൂദബി സാമ്പത്തിക വകുപ്പ് ചെയര്‍മാന്‍ മുഹമ്മദ് അലി ഷോറഫാ പറഞ്ഞു. നവീനമായ ഈ സംരംഭത്തിലൂടെ ഉപഭോക്താക്കള്‍ക്ക് മികച്ച സേവനം നല്‍കുന്ന ആമസോണിനെയും ലുലു ഗ്രൂപ്പിനെയും അഭിനന്ദിക്കുന്നതായും അദ്ദേഹം പറഞ്ഞു.

ഉപഭോക്താക്കളുടെ ആവശ്യങ്ങള്‍ക്കാണ് ലുലു എന്നും മുന്‍ഗണന നല്‍കിയിട്ടുള്ളതെന്ന് എം.എ. യൂസഫലി പറഞ്ഞു. ഏറ്റവും മികച്ച ഷോപ്പിങ്​ അനുഭവം നല്‍കുന്നതിന്​ ആമസോണുമായി സഹകരിക്കുന്നതില്‍ ഏറെ സന്തോഷമുണ്ടെന്നും അദ്ദേഹം പറഞ്ഞു. ലുലു ഗ്രൂപ്പുമായുള്ള ഈ സംയുക്ത സംരംഭം ഉപഭോക്താക്കള്‍ക്ക് മികച്ച സേവനമാണ് നല്‍കുകയെന്ന് ആമസോണ്‍ മിഡില്‍ ഈസ്റ്റ് വൈസ് പ്രസിഡന്‍റ് റൊണാള്‍ഡോ മോച്ചവര്‍ പറഞ്ഞു.

ലുലു ഗ്രുപ്പ് ചീഫ് എക്‌സിക്യൂട്ടീവ് ഓഫീസര്‍ സൈഫി രൂപാവാല, എക്‌സിക്യൂട്ടീവ് ഡയറക്ടര്‍ എം.എ. അഷ്‌റഫ് അലി എന്നിവരും സംബന്ധിച്ചു.