ലുലു ആഗോള റീട്ടെയിൽ കമ്പനികളുടെ പട്ടികയിൽ

ദുബൈ: പ്രമുഖ ഓഡിറ്റ് സ്ഥാപനമായ 'ഡിലോയിറ്റ് 2021' വർഷത്തെ ആഗോള തലത്തിൽ മുൻപന്തിയിൽ നിൽക്കുന്ന റീട്ടെയിൽ സ്ഥാപനങ്ങളുടെ പട്ടിക പ്രസിദ്ധീകരിച്ചു. മിഡിൽ ഈസ്​റ്റിൽ നിന്നും ലുലു ഗ്രൂപ്പ്, മാജിദ് അൽഫുത്തൈം (കാരിഫോർ) എന്നിവ മാത്രമാണ്​ പട്ടികയിൽ ഇടം പിടിച്ചത്. അമേരിക്കൻ സ്ഥാപനങ്ങളായ വാൾമാർട്ട്, ആമസോൺ, കോസ്​റ്റ്​കോ കോർപറേഷൻ എന്നിവ പട്ടികയിൽ ആദ്യ മൂന്ന് സ്ഥാനങ്ങളിലെത്തിയപ്പോൾ ജർമൻ കമ്പനിയായ ഷ്വാർസ് ഗ്രൂപ്പാണ്​ നാലാമത്. അമേരിക്കയിൽ തന്നെയുള്ള ക്രോഗെർ കമ്പനി പട്ടികയിൽ അഞ്ചാമതാണ്​.

10 രാജ്യങ്ങളിൽ പ്രവർത്തനമുള്ള ലുലു ഗ്രൂപ്പിന്​ റിപ്പോർട്ട് പ്രകാരമുള്ള വിറ്റുവരവ് അഞ്ച്​ ശതമാനം വാർഷിക വളർച്ചയോടെ 7.40 ശതകോടി ഡോളറാണ്​. അതേസമയം 16 രാജ്യങ്ങളിൽ പ്രവർത്തനമുള്ള മാജിദ് അൽഫുത്തൈമി​െൻറ വിറ്റുവരവ് 6.5 ശതമാനം വാർഷിക വളർച്ചയോടെ 7.65 ശതകോടി ഡോളറാണ്​.

ലോകത്ത് അതിവേഗം വളരുന്നം റീട്ടെയിൽ കമ്പനികളുടെ പട്ടികയിൽ ഇന്ത്യയിൽ നിന്നുള്ള റിലയൻസും ഇടം പിടിച്ചിട്ടുണ്ട്​. കോവിഡ് പ്രതിസന്ധി ഓൺലൈൻ വ്യാപാരത്തിന്​ കൂടുതൽ സാധ്യതകൾ നൽകിയപ്പോൾ ഭക്ഷ്യവസ്തുക്കൾ വിപണനം ചെയ്യുന്ന മുൻനിര റിട്ടെയിൽ കമ്പനികൾ ഈ അനുകൂല ഘടകം ഉപയോഗപ്പെടുത്തുന്നതാണു വാണിജ്യ ലോകം കണ്ടത്.

അതേസമയം ഫാഷൻ, ലക്ഷ്വറി ഉൽപന്നങ്ങൾ വിപണനം ചെയ്യുന്ന സ്ഥാപനങ്ങളായ ലോർഡ്​ ആൻഡ്​ ടൈലർ, ന്യൂമാൻ മാർകസ്​, ജെ.സി. പെന്നി എന്നിവ ഉൾപ്പെടെയുള്ള പ്രമുഖ റീ​ട്ടെയിൽ സ്ഥാപനങ്ങൾക്ക് കോവിഡ് വ്യാപനം കടുത്ത പ്രതിസന്ധികളാണ്​ നൽകിയത്. കോവിഡ് വ്യാപനം ആഗോള വാണിജ്യ വ്യവസായങ്ങളെ മന്ദഗതിയിലാക്കുമ്പോൾ നാല്​ ഇ-കോമേഴ്സ് സെൻററുകൾ അടക്കം 26 പുതിയ ഹൈപർമാർക്കറ്റുകളാണ്​ ലുലു ഗ്രൂപ്​ ഗൾഫ് രാജ്യങ്ങൾ, ഈജിപ്ത്, ഇന്തോനേഷ്യ, മലേഷ്യ എന്നിവിടങ്ങളിലായി 2020 മാർച്ചിന്​ ശേഷം ആരംഭിച്ചത്.

ഇക്കാലയളവിൽ 3,000 ലധികം പേർക്ക് പുതുതായി തൊഴിൽ ലഭ്യമാക്കാനും ലുലുവിന്​ കഴിഞ്ഞിട്ടുണ്ടെന്ന് ലുലു ഗ്രൂപ്​ ചെയർമാൻ എം.എ. യൂസഫലി പറഞ്ഞു. അടുത്ത രണ്ട് വർഷത്തിനുള്ളിൽ 30 പുതിയ ഹൈപർമാർക്കറ്റുകൾ ആരംഭിക്കുന്നതിനൊടൊപ്പം ഇ-കോമേഴ്സ് രംഗം വ്യാപകമായി വിപുലീകരിക്കാനും ഉദ്ദേശിക്കുന്നതായി അദ്ദേഹം പറഞ്ഞു.