ലൂവ്​റെ: ഉദ്​ഘാടന ദിനത്തിലെ  ഒാൺ​ൈലൻ ടിക്കറ്റുകൾ വിറ്റഴിഞ്ഞു

അബൂദബി: ശനിയാഴ്​ച തുറക്കുന്ന ലൂവ്​റെ അബൂദബിയുടെ ഉദ്​ഘാടന ദിനത്തിലേക്കുള്ള ഒാൺലൈൻ ടിക്കറ്റുകൾ വിറ്റഴിഞ്ഞു. അതേസമയം ഉദ്​ഘാടന ദിവസം ടിക്കറ്റുകൾ മ്യൂസിയം കൗണ്ടറിൽ ലഭ്യമാകും. ഒാൺലൈനിലും മ്യൂസിയം കൗണ്ടറിലും ഒരേ ടിക്കറ്റ്​ നിരക്കാണ്​. എന്നാൽ, ഉദ്​ഘാടന ദിവസത്തെ ഉയർന്ന ടിക്കറ്റ്​ വിൽപന കാരണം ശനിയാഴ്​ചക്ക്​ ശേഷം മ്യൂസിയം സന്ദർശിക്കാനാണ്​ അധികൃതർ നിർദേശിക്കുന്നത്​. 

ശനിയാഴ്​ച രാവിലെ പത്ത്​ മുതൽ മ്യൂസിയത്തിൽ എത്തുന്നവർക്ക്​ വാലറ്റ്​ സൗകര്യത്തോടെ പാർക്കിങ്​ ലഭ്യമാകും. മ്യൂസിയത്തിലെ കഫേയും ശനിയാഴ്​ച തുറക്കും. മ്യൂസിയം ടിക്കറ്റുള്ളവർക്ക്​ മാത്രമേ കഫേയിലും പ്രവേശനം അനുവദിക്കൂ. മുതിർന്നവർക്ക്​ 60 ദിർഹമാണ്​ ടിക്കറ്റ്​ നിരക്ക്​. 13നും 22നും ഇടയിൽ പ്രായമുള്ളവർക്ക്​ 30 ദിർഹം മതി. 13 വയസ്സിന്​ താഴെയുള്ളവർക്ക്​ പ്രവേശനം സൗജന്യമാണ്​. അംഗപരിമിയുള്ളവർക്ക്​ ഒരു സഹായിയോടൊപ്പം സൗജന്യ പ്രവേശനം അനുവദിക്കും.
ശനിയാഴ്​ച മുതൽ സന്ദർശകർക്ക്​ 600 പ്രദർശന വസ്​തുക്കൾ കാണാൻ സാധിക്കും. ഇതിൽ പകുതിയോളം ലൂവ്​റെ അബൂദബിയുടെ സ്വന്തമാണ്​. വായ്​പ അടിസഥാനത്തിലാണ്​ ബാക്കി പകുതി പ്രദർശിപ്പിക്കുന്നത്​.

വിൻസൻറ്​ വാൻഗോഗി​​െൻറ സെൽഫ്​ പോർട്രെയ്​റ്റ്​, പോൾ ഗാഗ്വി​​െൻറ ചിൽഡ്രൻ റെസ്​ലിങ്​, ലിയനാഡോ ഡാവിഞ്ചിയുടെ ലാ ബെല്ലെ ഫെറോണ്യേ തുടങ്ങിയ പ്രദർശനത്തിലുണ്ടാകും. ശനിയാഴ്​ച സന്ദർശനം നടത്തുന്നവർക്ക്​ രാവിലെ പത്തിന്​ അൽ അയ്യാല പരമ്പരാഗത നൃത്തം, ഉച്ചക്ക്​ മൂന്നിന്​ സംഗീതജ്ഞരും വാദ്യക്കാരും നടത്തുന്ന പരേഡ്​ തുടങ്ങിയ പരിപാടികളും കാണാൻ സാധിക്കും. നവംബർ 14 വരെ വിനോദപരിപാടികൾ ഉണ്ടാകും.