ആജീവനാന്ത ഗോൾഡൻ വിസ: വാർത്ത നിഷേധിച്ച് ഐ.സി.പി

അബൂദബി: ചില രാജ്യക്കാർക്ക് യു.എ.ഇ ആജീവനാന്ത ഗോൾഡൻവിസ അനുവദിക്കുന്നുവെന്ന അഭ്യൂഹങ്ങൾ നിഷേധിച്ച് ഫെഡറൽ അതോറിറ്റി ഫോർ ഐഡന്‍റിറ്റി, സിറ്റിസൺഷിപ്പ്​, കസ്റ്റംസ്​ ആൻഡ്​ പോർട്​ സെക്യൂരിറ്റി(ഐ.സി.പി). ചില പ്രദേശിക, അന്താരാഷ്ട്ര മാധ്യമങ്ങളും വെബ്​സൈറ്റുകളും വാർത്ത പ്രചരിപ്പിച്ച പശ്​ചാത്തലത്തിലാണ്​ അധികൃതർ ഇക്കാര്യം വ്യക്​തമാക്കിയത്​.

ഗോൾഡൻ വിസയുടെ വിഭാഗങ്ങൾ, വ്യവസ്ഥകൾ, നിയന്ത്രണങ്ങൾ എന്നിവ ഔദ്യോഗിക നിയമങ്ങളും മന്ത്രിതല തീരുമാനങ്ങളും അനുസരിച്ച്​ വ്യക്തമായി നിർവചിച്ചിട്ടുണ്ടെന്നും ഐ.സി.പി വ്യക്തമാക്കി. അതോറിറ്റിയുടെ വെബ്‌സൈറ്റിലും സ്മാർട്ട് ആപ്ലിക്കേഷനിലും ഇത്​ സംബന്ധിച്ച ഔദ്യോഗിക വിവരങ്ങൾ ലഭ്യമാണ്​. എല്ലാ ഗോൾഡൻ വിസ അപേക്ഷകളും യു.എ.ഇയിലെ ഔദ്യോഗിക സർക്കാർ​ ചാനലുകൾ വഴി മാത്രമാണ് കൈകാര്യം ചെയ്യുന്നതെന്നും, അപേക്ഷാ നടപടികളിൽ രാജ്യത്തിനകത്തോ പുറത്തോ പ്രവർത്തിക്കുന്ന ഒരു കൺസൾട്ടൻസി സ്ഥാപനത്തിനും അംഗീകാരം നൽകിയിട്ടില്ലെന്നും പ്രസ്താവന വ്യക്​തമാക്കി.

വിദേശത്ത് പ്രവർത്തിക്കുന്ന കൺസൾട്ടിങ് ഓഫീസ് പുറത്തിറക്കിയ വാർത്താകുറിപ്പിൽ എല്ലാവർക്കും ആജിവനാന്ത ഗോൾഡൻ വിസ എളുപ്പത്തിൽ ലഭിക്കുമെന്ന്​ അവകാശപ്പെട്ടത്​ അധികൃതരുടെ ശ്രദ്ധയിൽപെട്ടതിന്‍റ അടിസ്ഥാനത്തിലാണ്​ പ്രസ്താവന പുറപ്പെടുവിച്ചത്​. വാർത്താകുറിപ്പിലെ വിവരങ്ങൾക്ക്​ നിയമ സാധുതയില്ലെന്ന്​ അധികൃതർ വ്യക്​തമാക്കി​.

യു.എ.ഇയിൽ താമസിക്കാനും ജീവിക്കാനും ആഗ്രഹിക്കുന്ന വ്യക്തികളിൽ നിന്ന് പണം തട്ടാൻ ലക്ഷ്യമിട്ട്​ തെറ്റായ വിവരം പ്രചരിപ്പിച്ച സ്ഥാപനങ്ങൾക്കെതിരെ നിയമനടപടി സ്വീകരിക്കുമെന്നും അതോറിറ്റി വ്യക്തമാക്കി. തെറ്റായ അവകാശവാദങ്ങളുമായി സമീപിക്കുന്നവർക്ക് പണമോ, രേഖകളോ കൈമാറരുതെന്നും ഔദ്യോഗിക വിവരങ്ങൾ അതോറിറ്റിയുടെ വെബ്​സൈറ്റിലും 600522222 എന്ന നമ്പറിലും ലഭ്യമാണെമെന്നും അധികൃതർ അറിയിച്ചു.