വിടവാങ്ങിയത്​ യു.എ.ഇയുടെ ഉറ്റചങ്ങാതി​

ദുബൈ: യു.എ.ഇയുമായി ഏറെ സൗഹൃദം പുലർത്തിയ നേതാവാണ്​ കുവൈത്ത്​ അമീർ ശൈഖ്​ സബാഹ് അൽഅഹ്​മദ് അസ്സബാഹ്. 2017 ജൂൺ ഏഴിന്​​ അദ്ദേഹം യു.എ.ഇ സന്ദർശിച്ചിരുന്നു. ഖത്തർ ഉപരോധവുമായി ബന്ധപ്പെട്ട്​ പശ്ചിമേഷ്യയിലുണ്ടായ അഭിപ്രായഭിന്നതകൾ പരിഹരിക്കാൻ മധ്യസ്ഥനായിട്ടായിരുന്നു അദ്ദേഹത്തി​െൻറ സന്ദർശനം​. 87ാം വയസ്സിൽ പ്രായത്തി​െൻറ ആകുലതകളൊന്നുമില്ലാതെ ചുറുചുറുക്കോടെയായിരുന്നു അമീറി​െൻറ പ്രവർത്തനങ്ങൾ.

സമാധാനത്തി​െൻറ വെള്ളരിപ്രാവ്​ എന്നായിരുന്നു അദ്ദേഹത്തെ പലരും വിളിച്ചിരുന്നത്​. മൂന്ന​ു​ ദിവസംകൊണ്ട്​ സൗദിയും യു.എ.ഇയും ഖത്തറും സന്ദർശിച്ചാണ്​ അദ്ദേഹം ഒത്തുതീർപ്പ്​ ശ്രമങ്ങൾ നടത്തിയത്​. 2014ലും സമാന പ്രശ്​നമുണ്ടായപ്പോൾ മധ്യസ്ഥ​െൻറ റോളിൽ അമീർ ഉണ്ടായിരുന്നു. സമദൂര നിലപാടുകളിലൂടെ ജി.സി.സി ഐക്യത്തിന് കരുത്തു പകരാൻ ശൈഖ്​ സബാഹിന്​ കഴിഞ്ഞു.മൂന്നു​ വർഷം മുമ്പ്​​ യു.എ.ഇയിൽ എത്തിയപ്പോൾ ഹൃദ്യമായ സ്വീകരണമായിരുന്നു സബീൽ പാലസിൽ അദ്ദേഹത്തിനായി ഒരുക്കിയത്​.

യു.എ.ഇ വൈസ്​ പ്രസിഡൻറും ​പ്രധാനമന്ത്രിയും ദുബൈ ഭരണാധികാരിയുമായ ശൈഖ്​ മുഹമ്മദ്​ ബിൻ റാശിദ്​ ആൽ മക്​തൂം, അബൂദബി കിരീടാവകാശിയും യു.എ.ഇ സായുധസേനയുടെ ഡെപ്യൂട്ടി സുപ്രീം കമാൻഡറുമായ ശൈഖ്​ മുഹമ്മദ്​ ബിൻ സായിദ്​ ആൽ നഹ്​യാൻ എന്നിവർ ചേർന്നാണ്​ അദ്ദേഹത്തെ സ്വീകരിച്ചത്​. അറബ്​ ഉച്ചകോടികളിലെല്ലാം യു.എ.ഇ നേതാക്കളുമായി അടുത്തിടപഴകിയിരുന്നു. ലോകനേതാക്കളിൽ നന്മയുള്ള കാരണവരുടെ സ്ഥാനമാണ്​ ശൈഖ്​ സബാഹിന്​.