എക്​സ്​പോയിൽ​ രാഷ്​ട്രനേതാക്കൾ എത്തും

ദുബൈ: ഒക്​ടോബറിൽ ആരംഭിക്കുന്ന ദുബൈ എക്​സ്​പോ 2020 കാണാനും അതത്​ രാജ്യങ്ങളുടെ പവലിയൻ സന്ദർശിക്കാനുമായി വിവിധ രാഷ്​ട്രനേതാക്കൾ എത്തിച്ചേരും.

ആറു മാസത്തെ മേളക്കിടയിൽ 192 രാജ്യങ്ങളുടെ ദേശീയ ദിനാചരണങ്ങളും സംഘടിപ്പിക്കപ്പെടും. ​എക്​സ്​പോയുടെ ഹൃദയമെന്നറിയപ്പെടുന്ന അൽ വസ്​ൽ പ്ലാസയിലാണ്​ കലാസാംസ്​കാരിക ആഘോഷങ്ങളോടെ ദേശീയ ദിനാചരണങ്ങൾ നടക്കുക. ജനുവരി 26ന്​ ഇന്ത്യയുടെ റിപ്പബ്ലിക്​ ദിനാചരണവും ഇതി​െൻറ ഭാഗമായി പ്രതീക്ഷിക്കപ്പെടുന്നു​.

ഒാരോ രാജ്യവും തങ്ങളുടെ സാംസ്​കാരിക-പൈതൃക കാഴ്​ചകൾ ലോകത്തിന്​ മുന്നിൽ പ്രദർശിപ്പിക്കുന്ന രീതിയിലാണ്​ പരിപാടികൾ അരങ്ങേറുക.രാഷ്​ട്രനേതാക്കളിൽ ബ്രസീലിയൻ പ്രസിഡൻറ്​ ജെയ്​ർ ബോൾസൊനാരോയും സൈപ്രസ്​ പ്രസിഡൻറ്​ നികോസ്​ അനസ്​ടേഷ്യഡ്​സും എക്​സ്​പോക്ക്​ എത്തുന്നത്​ സ്​ഥിരീകരിച്ചിട്ടുണ്ട്​.

ബ്രസീലി​െൻറ 200ാം സ്വാതന്ത്ര്യദിനം വരുന്ന വർഷത്തിൽ ലോകത്തിന്​ മുന്നിൽ രാജ്യത്തെ പരിചയപ്പെടുത്തുകയെന്ന രൂപത്തിൽ എക്​സ്​പോ ഉപയോഗിക്കുന്നതി​െൻറ ഭാഗമായാണ്​ പ്രസിഡൻറി​െൻറ സന്ദർശനമെന്ന്​ അധികൃതർ അറിയിച്ചു. യു.എ.ഇയുമായി രാഷ്​ട്രീയബന്ധം സുദൃഢമാക്കുന്നതിനുകൂടിയാണ്​ സൈപ്രസ്​ പ്രസിഡൻറ്​ സന്ദർശനത്തിന്​ ഒരുങ്ങുന്നത്​.

ഇദ്ദേഹത്തിനൊപ്പം മന്ത്രിമാരുടെ സംഘവും അനുഗമിക്കും. ഇസ്രായേലിൽനിന്ന്​ മന്ത്രിതലസംഘം മേളക്കെത്തുമെന്ന്​ അംബാസഡർ വെളിപ്പെടുത്തി.

അടുത്ത ആഴ്​ചകളിൽ കൂടുതൽ രാഷ്​ട്രങ്ങൾ സന്ദർശനത്തിനെത്തുന്ന നേതാക്കളുടെ വിവരങ്ങൾ വെളിപ്പെടുത്തും. ഇന്ത്യയിൽനിന്ന്​ ആരെന്ന്​ ഇതുവരെ പ്രഖ്യാപിച്ചിട്ടില്ല. എക്​സ്​പോയിൽ പ​ങ്കെടുക്കുന്ന വിവിധ അന്താരാഷ്​ട്ര സംഘടനകളും വിവിധ പരിപാടികൾ ആസൂത്രണംചെയ്യുന്നുണ്ട്​.

സന്ദർശകർക്ക് ഓരോ രാജ്യത്തി​െൻറയും രുചി അനുഭവിക്കാനും എക്​സ്​പോയിൽ സാധ്യമാകും. പരമ്പരാഗത വിഭവങ്ങളും മേളയിലെ പ്രത്യേക റെസ്​റ്റാറൻറുകളിൽ ലഭ്യമാണ്​.ദേശീയ ദിനാചണങ്ങൾ സംഘടിപ്പിക്കുന്ന ദിവസങ്ങളിൽ അതത്​ രാജ്യങ്ങളുടെ ഭക്ഷണ വൈവിധ്യങ്ങൾ സന്ദർശകർക്ക്​ അനുഭവിക്കാനാകും.