അമുസ്​ലിംകൾക്ക്​ വിൽപത്രം  രജിസ്​റ്റർ ചെയ്യാൻ പുതിയ നിയമം

ദുബൈ: അമുസ്​ലിം പ്രവാസികൾക്ക്​ വിൽപത്രവും പിന്തുടർച്ചാവകാശ പത്രികയുമൊക്കെ രജിസ്​റ്റർ ചെയ്യുന്നതിന്​ കൂടുതൽ നിയമസംരക്ഷണം നൽകുന്ന നിയമം ചൊവ്വാഴ്​ച നിലവിൽവന്നു. ദീർഘകാലമായി ദുബൈയിൽ താമസിക്കുന്നവർക്കാണ്​ ഇതി​​െൻറ പ്രയോജനം കിട്ടുക. ഇതനുസരിച്ച്​ അമുസ്​ലിം പ്രവാസികൾക്ക്​ അന്താരാഷ്​ട്രതലത്തിൽ അംഗീകരിക്കപ്പെട്ടിട്ടുള്ള നിയമങ്ങളുടെ അടിസ്​ഥാനത്തിൽ ഇംഗ്ലീഷിൽ തയാറാക്കുന്ന വിൽപത്രങ്ങളും മറ്റും രജിസ്​റ്റർ ചെയ്യാം. ഇത്തരത്തിലുള്ള നിയമം കഴിഞ്ഞ മേയിൽ അബൂദബിയിൽ നടപ്പാക്കിയിരുന്നു. മുസ്​ലിംകൾക്ക്​ ശരീഅത്ത്​ നിയമമായിരിക്കും ബാധകം. 

15 ാം നമ്പറിലുള്ള നിയമം യു.എ.ഇ വൈസ്​ പ്രസിഡൻറും പ്രധാനമന്ത്രിയും ദുബൈ ഭരണാധികാരിയുമായ ശൈഖ്​ മുഹമ്മദ്​ ബിൻ റാശിദ്​ ആൽ മക്തൂം ആണ്​ പുറപ്പെടുവിച്ചത്​. ദുബൈയിൽ നിക്ഷേപമിറക്കാൻ ആഗ്രഹിക്കുന്നവർക്ക്​ കൂടുതൽ ആത്മവിശ്വാസം പകരുന്നതാണ്​ പുതിയ നിയമം. ദുബൈ കോടതികളിലും ദുബൈ ഇൻറർനാഷനൽ ഫൈനാൻഷ്യൽ സ​െൻറർ കോടതികളിലും ഇൗ നിയമം ബാധകമായിരിക്കും. 

മുസ്​ലിം ഇതര പ്രവാസികൾക്ക്​ വിൽപത്രം തയാറാക്കാൻ പല വഴികൾ ഉണ്ട്​. പ്രവാസിയുടെ മാതൃരാജ്യത്തെ നിയമം അനുസരിച്ച്​ പത്രം തയാറാക്കാം. ഇത്​ ആ രാജ്യത്തി​​െൻറ എംബസിയും യു.എ.ഇയുടെ വിദേശകാര്യ മന്ത്രാലയവും സാക്ഷ്യപ്പെടുത്തണം. 2250 ദിർഹം അടച്ചാൽ ദുബൈ കോടതികളിലെ പബ്ലിക്​ നോട്ടറികളും തയാറാക്കി നൽകും. ദുബൈ ഇൻറർനാഷനൽ ഫൈനാൻഷ്യൽ സ​െൻററിൽ രജിസ്​റ്റർ ചെയ്​ത ലീഗൽ കൺസൾട്ടൻറുമാർക്കും ഇത്​ തയാറാക്കാം. 
2500 ദിർഹം മുതൽ 5000 ദിർഹം വരെ ആയിരിക്കും ഇതിനുള്ള ചെലവ്​.