തൊഴിലാളികൾക്ക്​ സൗജന്യ നിയമപരിരക്ഷ നൽകാൻ വിപുല പദ്ധതി

ദുബൈ: സാമ്പത്തിക ശേഷിയില്ലാത്ത തൊഴിലാളികൾക്ക്​  നിയമസഹായം നൽകാൻ ലക്ഷ്യമിട്ട്​ ദുബൈ തൊഴിൽ കോടതി ആരംഭിച്ച സ​ംരംഭത്തിൽ സന്നദ്ധസേവനത്തിനൊര​ുങ്ങി 14 അഭിഭാഷകർ.  ഒയുൻ ഇനിഷ്യേറ്റിവ്​ എന്ന പേരിൽ നടപ്പാക്കുന്ന പദ്ധതിയിൽ നിയമസഹായത്തിനു പുറമെ നിയമ നടപടികൾ എളുപ്പത്തിലാക്കാൻ ഏകദിന കോടതികളും ആരംഭിക്കുമെന്ന്​ തൊഴിൽ കോടതി ചീഫ്​ ജസ്​റ്റിസ്​ ജഡ്​ജ്​ ജമാൽ അലീം അൽ ജബീറി പറഞ്ഞു. സനദ്​ പദ്ധതിക്കു കീഴിൽ സമ്പൂർണ സൗജന്യ നിയമസേവനം നൽകുന്നതിനും നടപടികളുണ്ട്​. ​ മാനവ വിഭവ^സ്വദേശിവത്​കരണ മന്ത്രാലയവുമായി കൂടിയാലോചിച്ച്​ ഏകദിന കോടതികൾക്ക്​ തുടക്കമിടും. കഴിഞ്ഞ വർഷം 9,000 കേസുകളാണ്​ ​തൊഴിൽ കോടതിയിലെത്തിയത്​. ഇതിൽ 4,711 എണ്ണം ആറു മാസം കൊണ്ട്​ തീർപ്പാക്കി. ഇൗ വർഷം ആറു മാസം കൊണ്ട്​ 6,895 കേസുകൾ ​തീർപ്പായെന്നും കേസുകൾ എളുപ്പം പരിഹരിക്കാൻ ലക്ഷ്യമിട്ടുള്ള നടപടികളാണ്​ ഇതിനു സഹായകമായതെന്നും ജഡ്​ജി പറഞ്ഞു.

പരാതികൾ രമ്യമായി പറഞ്ഞു തീർക്കാനാണ്​ ഏകദിന കോടതി ആദ്യം ശ്രമിക്കുക. അതു സാധ്യമാവാതെ വന്നാൽ വാദം കേട്ട്​ അന്നു തന്നെ വിധി പ്രഖ്യാപിക്കും. തൊഴിലാളികളുടെ അവകാശങ്ങൾ ഏറ്റവും വേഗത്തിൽ ഉറപ്പാക്കാൻ ഇത്തരം കോടതികൾ സഹായകമാവും. നടപടികൾ സുഗമമാക്കുന്നതിന്​ ചില പ്രക്രിയകൾ പുനക്രമീകരിക്കേണ്ടതുണ്ട്​. ലീഗൽ നോട്ടീസ്​ പത്രങ്ങളിൽ പ്രസിദ്ധീകരിക്കണ മെന്ന നിബന്ധന പാവപ്പെട്ട തൊഴിലാളികൾക്ക്​ താങ്ങാനാവുന്നതല്ല.  

ആഴ്​ചയിൽ രണ്ടു ദിവസം രാത്രി നേരങ്ങളിൽ തൊഴിൽ കേസുകൾ വാദം കേൾക്കുന്ന നടപടിക്ക്​ മികച്ച പ്രതികരണമാണ്​.ഇതിനകം300 കേസുകൾ രാത്രി ഷിഫ്​റ്റിൽ കൈകാര്യം ചെയ്​തു. ഇൗ ആഴ്​ച മുതൽ രാത്രി ഷിഫ്​റ്റിൽ കൂടുതൽ കേസുകൾ പരിഗണിക്കും.രേഖകൾ വിവർത്തനം ചെയ്യുന്ന സേവനവും സൗജന്യമാക്കാൻ ആലോചനയുണ്ട്​.