കോവിഡ്: അബൂദബിയിൽ നിയന്ത്രണങ്ങളിൽ ഇളവ്

ദുബൈ: കോവിഡ് വ്യാപനം തുടരുന്ന പശ്ചാത്തലത്തിൽ അബൂദബിയിലെ കടുത്ത നിയന്ത്രണങ്ങളിൽ ഇളവ് പ്രഖ്യാപിച്ചു. ഡിസംബർ 24ഓടെ എല്ലാ നിയന്ത്രണങ്ങളും പൂർണമായും പിൻവലിക്കുമെന്ന പ്രചാരണം തുടരുന്നതിനിടെയാണ് ഇളവുകൾ മാത്രം വരുത്തി നിയന്ത്രണങ്ങൾ തുടരാൻ അബൂദബി എമർജൻസി ക്രൈസിസ് ആൻഡ് ഡിസാസ്​റ്റർ കമ്മിറ്റി തീരുമാനിച്ചത്.

ക്വാറൻറീൻ അടക്കം നടപടിക്രമങ്ങളിൽ ഇളവ് വരുത്തിയെങ്കിലും അബൂദബിയിലേക്കുള്ള പ്രവേശനത്തിന് കോവിഡ് പരിശോധന തുടരും. നേരത്തെ ടെസ്​റ്റ്​ നടത്തി 48 മണിക്കൂറിനകം പ്രവേശിക്കണമെന്ന നിബന്ധനയിൽ മാറ്റം വരുത്തിയിട്ടുണ്ട്. ഇനി മുതൽ ടെസ്​റ്റ്​ കഴിഞ്ഞ് 72 മണിക്കൂറിനകം പ്രവേശിക്കാം.

മറ്റു എമിറേറ്റുകളിൽ നിന്നോ വിദേശ രാജ്യങ്ങളിൽ നിന്നോ എത്തുന്നവർ പ്രവേശിച്ചു കഴിഞ്ഞാൽ നാലാം ദിവസവും എട്ടാം ദിവസവും പി.സി.ആർ ടെസ്​റ്റ്​ നടത്തണമെന്ന നേരത്തെയുണ്ടായിരുന്ന നിബന്ധനയിലും മാറ്റം വന്നിട്ടുണ്ട്. ഇനി മുതൽ ആറ് ദിവസത്തിൽ കൂടുതൽ താമസിക്കുകയാണെങ്കിൽ ആറാം ദിവസവും 12 ദിവസത്തിൽ കൂടുതൽ തങ്ങുകയാണെങ്കിൽ 12-ാം ദിവസവും ടെസ്​റ്റ്​ നടത്തിയാൽ മതി.

കോവിഡ് വ്യാപനം താരതമ്യേന കുറഞ്ഞ ഗ്രീൻ ലിസ്​റ്റിലുള്ള രാജ്യങ്ങളിൽ നിന്നെത്തുന്നവർക്ക് ക്വാറൻറീൻ നിർബന്ധമില്ലെന്ന പ്രഖ്യാപനവുമുണ്ട്. എന്നാൽ ഇന്ത്യയടക്കമുള്ള രാജ്യങ്ങളിൽ നിന്നെത്തുന്നവർ 10 ദിവസം ക്വാറൻറീനിൽ കഴിയണം. നേരത്തെ ഇതു 14 ദിവസമായിരുന്നു. കോവിഡ് സമ്പർക്കമുള്ളവർക്കും ഇനി മുതൽ 10 ദിവസത്തെ ക്വാറൻറീൻ മതി. ഇത്തരക്കാർ എട്ടാം ദിവസം ടെസ്​റ്റ്​ നടത്തി നെഗറ്റീവാണെങ്കിൽ 10 ദിവസത്തെ ക്വാറൻറീൻ മതി. ദേശീയ വാക്സിനേഷൻ പ്രോഗ്രാമിലെ മൂന്നാംഘട്ട ക്ലിനിക്കൽ പരീക്ഷണങ്ങളുടെ ഭാഗമായി, മെബൈൽ ആപ്പിൽ ഗോൾഡൻ സ്​റ്റാർ മാർക്ക് ലഭിച്ചവർക്ക് നിയന്ത്രണങ്ങൾ ബാധകമല്ല. ഇവരെ നേരത്തെ ക്വാറൻറീനിൽ നിന്ന് ഒഴിവാക്കിയിരുന്നു.