സാ​ങ്കേതിക തകരാർ; കൊച്ചി-ഷാർജ വിമാനം അടിയന്തരമായി മുംബൈയിലിറക്കി

ഷാർജ: ചൊവ്വാഴ്ച പുലർച്ചെ കൊച്ചിയിൽ നിന്ന് ഷാർജയിലേക്ക് പുറപ്പെട്ട എയർ ഇന്ത്യ എക്സ്പ്രസ് വിമാനം സാ​ങ്കേതിക തകരാർ മൂലം അടിയന്തരമായി മുംബൈ വിമാനത്താവളത്തിലിറക്കി. ഐ.എക്സ് 411 നമ്പർ വിമാനമാണ് സാങ്കേതികത്തകരാർ ശ്രദ്ധയിൽപെട്ടതിനെ തുടർന്ന്​ യാത്രക്കിടയിൽ മുംബൈയിലിറക്കിയത്. വിമാനത്തിലെ മുന്നൂറിലേറെ യാത്രക്കാരിൽ ഏ​റെയും യു.എ.ഇയിലെ പ്രവാസി മലയാളികളാണ്​. കൊച്ചിയിൽ നിന്ന് പുലർച്ചെ 2.20നാണ് വിമാനം പറന്നുയർന്നത്​.

വിമാനം ഉയർന്നത്​ മുതൽ അസ്വാഭാവിത അനുഭവപ്പെട്ടിരുന്നെന്നും തുടർന്ന്​ രണ്ട്​ മണിക്കൂർ കഴിഞ്ഞ ശേഷമാണ്​ മുംബൈയിൽ ഇറക്കിയതെന്നും യാത്രക്കാർ ‘ഗൾഫ്​ മാധ്യമ’ത്തോട്​ പറഞ്ഞു. വിമാനം ഇറങ്ങുന്ന വേളയിൽ അടിയന്തിര സാഹചര്യം നേരിടുന്നതിന്​ ഫയർ ഫോഴ്സ് അടക്കമുള്ള സജ്ജീകരണങ്ങൾ വിമാനത്താവളത്തിൽ ഒരുക്കിയിരുന്നു. പുലർച്ചെ നാലരയോടെ മുംബൈയിലിറങ്ങിയ വിമാനത്തിന്‍റെ തകരാർ പരിഹരിക്കാൻ മണിക്കൂറുകൾ ശ്രമിച്ചെങ്കിലും സാധിച്ചില്ല. തുടർന്ന്​ ആറു മണിയോടെ യാത്രക്കാരെ വിമാനത്തിൽ നിന്ന്​ പുറത്തിറക്കി. എന്നാൽ പിന്നെയും മണിക്കൂറുകൾ കഴിഞ്ഞ്​ രാവിലെ 10മണിയോടെയാണ്​ ഹോട്ടലിലേക്ക്​ മാറ്റിയതെന്നും ഭക്ഷണം അടക്കമുള്ള സൗകര്യങ്ങൾ തൃപ്തികരമായ രീതിയിൽ ഒരുക്കിയില്ലെന്നും യാത്രക്കാർ പരാതിപ്പെട്ടു.

യാത്രക്കാരെ മുഴുവൻ മുംബൈയിലെ വിവിധ ഹോട്ടലുകളിലേക്ക് മാറ്റിയിട്ടുള്ളത്​. അതിനിടെ ചില യാത്രക്കാർക്ക്​ മറ്റു വിമാനങ്ങളിലായി യാത്രക്ക്​ അധികൃതർ സംവിധാനമൊരുക്കിയിട്ടുണ്ട്​. ചൊവ്വാഴ്ച രാത്രി എട്ടുമണിയോടെ വിമാനം ഷാർജയിലേക്ക്​ യാത്ര പുനരാരംഭിക്കുമെന്നാണ്​ യാത്രക്കാർക്ക്​ അറിയിപ്പ്​ ലഭിച്ചിട്ടുണ്ടെങ്കിലും അനിശ്​ചിതത്വം തുടരുകയാണെന്ന്​ യാത്രക്കാർ പറഞ്ഞു.