കൊച്ചി വിമാനം 24 മണിക്കൂർ വൈകി; പ്രതിഷേധവുമായി യാത്രക്കാർ

ഷാർജ: യാത്രക്കാരെ വലക്കുന്ന എയർ ഇന്ത്യ എക്സ്​പ്രസിന്‍റെ പതിവ്​ തുടരുന്നു. തിങ്കളാഴ്ച ഷാർജയിൽനിന്ന്​ കൊച്ചിയിലേക്ക്​ പുറപ്പെടേണ്ടിയിരുന്ന വിമാനം 24 ​മണിക്കൂർ വൈകിയാണ്​ പറന്നത്​. ഇതിനിടയിൽ രണ്ടു മണിക്കൂറോളം വിമാനത്തിനുള്ളിൽ കയറ്റി ഇരുത്തുകയും തിരിച്ചിറക്കുകയും ചെയ്തു. ​യാത്രക്കാർ പ്രതിഷേധവുമായി രംഗത്തെത്തിയെങ്കിലും സാ​ങ്കേതിക തകരാർ എന്ന സ്ഥിരം ന്യായംപറഞ്ഞ്​ അധികൃതർ ഒഴിവാകുകയായിരുന്നു. കഴുത്തറുപ്പൻ നിരക്ക്​ നൽകി യാത്രക്കൊരുങ്ങിയവർക്കാണ്​ ഈ ദുരിതം.

ഞായറാഴ്ച വൈകുന്നേരം അഞ്ചിന്​ ഷാർജ വിമാനത്താവളത്തിൽനിന്ന്​ യാത്ര ചെയ്യാനാണ്​ ടിക്കറ്റ്​ എടുത്തിരുന്നത്​. എന്നാൽ, സമയം രാത്രി 12ലേക്ക്​ മാറ്റിയതായി അറിയിച്ച്​ വൈകി മെസേജ്​ ലഭിച്ചു. ഇതു​ ശ്രദ്ധിക്കാതെ യാത്രക്കാരിൽ നല്ലൊരു ശതമാനവും ഉച്ചക്ക്​ രണ്ടിനുതന്നെ എയർപോർട്ടിൽ എത്തി. രാത്രി 12ന്​ എങ്കിലും പുറപ്പെടുമെന്ന ആശ്വാസത്തിൽ ക്ഷമയോടെ യാത്രക്കാർ കാത്തിരുന്നെങ്കിലും 12 ആയിട്ടും വിവരമൊന്നും ലഭിച്ചില്ല. പുലർച്ച 2.30ഓടെ എല്ലാവരെയും വിമാനത്തിൽ കയറ്റി.

എന്നാൽ, രണ്ട്​ മണി​ക്കൂറോളം വിമാനത്തിൽ ഇരുത്തിയശേഷം വീണ്ടും യാത്രക്കാരെ തിരിച്ചിറക്കി ലോബിയിലേക്ക്​ മാറ്റി. സാ​ങ്കേതിക തകരാറാണെന്ന വാദം ആവർത്തിച്ച അവർ ഉച്ചക്ക്​ 12ന്​ വിമാനം പുറപ്പെടും എന്ന്​ അറിയിച്ചു. എന്നാൽ, ഈ സമയമായിട്ടും വിമാനം പറന്നില്ല. യാത്രക്കാർ പലതവണ പ്രതിഷേധം അറിയിച്ചെങ്കിലും അധികൃതരിൽ നിന്ന്​ വ്യക്​തമായ മറുപടിയൊന്നും ലഭിച്ചില്ല. ഒടുവിൽ വൈകുന്നേരം 5.15ഓടെയാണ്​ വിമാനം പുറപ്പെട്ടത്​.

പ്രായമായവരും കുട്ടികളും അടിയന്തര ആവശ്യങ്ങൾക്ക്​ നാട്ടിലെത്തേണ്ടവരും വിമാനത്തിലുണ്ടായിരുന്നു. നാട്ടിലേക്ക്​ 1700 ദിർഹമിന്‍റെ മുകളിലാണ്​ (34,000 രൂപ) യാത്രാനിരക്ക്​. ഉയർന്ന നിരക്ക്​ നൽകി നാട്ടിലേക്ക്​ പോകുമ്പോഴും ദുരിതത്തിനു മാത്രം കുറവില്ലെന്ന്​ യാത്രക്കാർ പരാതിപ്പെടുന്നു. കഴിഞ്ഞ ദിവസവും എയർ ഇന്ത്യ വിമാനം 30 മണിക്കൂറോളം വൈകിയിരുന്നു.