ഏറ്റവും നിക്ഷേപ സുരക്ഷയുള്ള സംസ്ഥാനം കേരളം -മുഖ്യമന്ത്രി

ദുബൈ: ഇന്ത്യയിൽ ഏറ്റവും നിക്ഷേപ സുരക്ഷയുള്ള സംസ്​ഥാനം കേരളമാണെന്ന്​ കേരള മുഖ്യമന്ത്രി പിണറായി വിജയൻ. നിക്ഷേപകരെ കേരളത്തിലേക്ക്​ ക്ഷണിക്കുന്നതായും അദ്ദേഹം കൂട്ടിച്ചേർത്തു. കെ.എസ്.ഐ.ഡി.സി, കിന്‍ഫ്ര, കെ-ബിപ് എന്നിവയുമായി സഹകരിച്ച്​ ഫെഡറേഷന്‍ ഓഫ് ഇന്ത്യന്‍ ചേംബര്‍ ഓഫ് കോമേഴ്സ് ആന്‍ഡ് ഇന്‍ഡസ്ട്രി (ഫിക്കി) ദുബൈയിൽ സംഘടിപ്പിച്ച ഇൻവെസ്​റ്റേഴ്​സ്​ മീറ്റിൽ സംസാരിക്കുകയായിരുന്നു അദ്ദേഹം.

അടിസ്ഥാന സൗകര്യം, ഐ.ടി സ്റ്റാര്‍ട്ടപ്, ആരോഗ്യം, ടൂറിസം തുടങ്ങിയ മേഖലകളിലെ കേരളത്തിന്‍റെ നിക്ഷേപ അവസരങ്ങൾ ഇൻവെസ്റ്റേഴ്‌സ്‌ മീറ്റിൽ പരിചയപ്പെടുത്തി. വ്യവസായം തുടങ്ങാന്‍ സൗകര്യം ഒരുക്കുന്ന ഏകജാലകമായ കെ സ്വിഫ്റ്റ് ഉള്‍പ്പെടെയുള്ള ആശയങ്ങൾ നിക്ഷേപകര്‍ക്ക് പരിചയപ്പെടുത്തി. കെ- റെയിൽ ഉൾപ്പെടെയുള്ള വികസന പദ്ധതികളെ കുറിച്ച് മന്ത്രി പി. രാജീവ് സംസാരിച്ചു. കെ- റെയിലിന്‍റെ ഡി.പി.ആർ തയാറായിവരുന്നു. പ്രവാസി നിക്ഷേപകരുടെ പ്രശ്നങ്ങൾ പരിഹരിക്കാൻ സമിതിയെ നിയോഗിക്കുമെന്നും പി. രാജീവ് പറഞ്ഞു. ദുബൈയിലെ ഇന്ത്യൻ കോൺസുൽ ജനറൽ ഡോ. അമൻ പുരി, ലുലു ഗ്രൂപ്​ ചെയർമാൻ എം.എ. യൂസുഫലി, ഡോ. ആസാദ്​ മൂപ്പൻ തുടങ്ങിയവർ സംസാരിച്ചു.