ഫസ്സ ഫാൽക്കൺസ് റേസിങ്​ കപ്പ്​ രണ്ടാം പതിപ്പ് നാളെ മുതൽ

ദുബൈ: ​ഫസ്സ ഫാൽക്കൺസ് റേസിങ്​ കപ്പിന്റെ (തിൽവ) രണ്ടാം പതിപ്പ് ജനുവരി 12ന് ദുബൈയിലെ ഹംദാൻ ബിൻ മുഹമ്മദ് ഹെറിറ്റേജ് സെന്ററിലെ ലഹ്ബാബ് ട്രാക്കിൽ ആരംഭിക്കും. ദുബൈ സെക്കൻഡ്​ ഡെപ്യൂട്ടി ഭരണാധികാരിയും ഇന്റർനാഷണൽ ഫെഡറേഷൻ ഫോർ ഫാൽക്കൺറി സ്പോർട്സ് ആൻഡ് റേസിങിന്റെ പ്രസിഡന്റും യു.എ.ഇ ഫാൽക്കൺസ് ഫെഡറേഷൻ പ്രസിഡന്റുമായ ശൈഖ്​ അഹമ്മദ് ബിൻ മുഹമ്മദ് ബിൻ റാശിദ് ആൽ മക്തൂമിന്റെ നിർദേശപ്രകാരമാണ്​ മൽസരം ഒരുക്കുന്നത്​.

കഴിഞ്ഞ വർഷം നടന്ന ആദ്യ പതിപ്പ്​ വിപുലമായ പങ്കാളിത്തം, നൂതന സാങ്കേതിക നിലവാരം, ഫാൽക്കണർമാരുടെ സമർപ്പണവും പ്രൊഫഷണലിസവും പ്രതിഫലിപ്പിക്കുന്ന മത്സര ഫലങ്ങൾ എന്നിവയാൽ ശ്രദ്ധിക്കപ്പെട്ടിരുന്നു.

ദുബൈ കിരീടാവകാശിയും ഉപപ്രധാനമന്ത്രിയും പ്രതിരോധമന്ത്രിയുമായ ശൈഖ്​ ഹംദാൻ ബിൻ മുഹമ്മദ്​ ബിൻ റാശിദ്​ ആൽ മക്​തൂം ഫാൽക്കൺറി റേസിങിന് നൽകുന്ന പിന്തുണയെ മാനിച്ചാണ് ഫസ്സ ഫാൽക്കൺസ് റേസിങ്​ കപ്പ് രൂപീകരിച്ചത്. പബ്ലിക് കാറ്റഗറി (ഓണേഴ്‌സ് - ഓപ്പൺ) മത്സരങ്ങൾ ജനുവരി 12ന് നടക്കും. ശെഖ്​ കാറ്റഗറി മത്സരങ്ങൾ ജനുവരി 17ന് ആറ് റൗണ്ടുകളിലായി നടക്കും.