ഇസ്രായേൽ ആക്രമണം: ഖത്തറിന്​ പിന്തുണ ആവർത്തിച്ച്​ യു.എ.ഇ

ദുബൈ: ​ദോഹയിൽ ഹമാസ്​ നേതാക്കളെ ലക്ഷ്യംവെച്ച്​ ഇസ്രായേൽ നടത്തിയ ആക്രമണത്തിൽ ഖത്തറിന് പൂർണപിന്തുണ ആവർത്തിച്ച്​ യു.എ.ഇ. യു.എ.ഇയുടെ നിലപാട്​ തത്വാധിഷ്​ഠിതവും പതിറ്റാണ്ടുകളായി വെല്ലുവിളികളിലൂടെയും ​​പ്രതിസന്ധികളിലൂടെയും ഗൾഫ്​ രാജ്യങ്ങൾ പരസ്പരം പങ്കുവെച്ച പിന്തുണയിൽനിന്ന്​ ഉരുത്തിരിഞ്ഞതുമാണെന്ന്​ എക്സിൽ പങ്കുവെച്ച സന്ദേശത്തിൽ യു.എ.ഇ പ്രസിഡന്‍റിന്‍റെ നയതന്ത്ര ഉപദേഷ്ടാവ്​ ഡോ. അൻവർ മുഹമ്മദ്​ ഗർഗാഷ്​ പറഞ്ഞു.

ഗൾഫ്​ സഹകരണ കൗൺസിലിലും ദോഹയിൽ നടന്ന അറബ്​-ഇസ്​ലാമിക്​ ഉച്ചകോടിയിലും മുഴുവൻ രാജ്യങ്ങളും ഖത്തറിന്​ ഐക്യദാർഢ്യം പ്രഖ്യാപിച്ചിരിക്കുകയാണ്​. വെല്ലുവിളികളിൽ ഖത്തർ ഒരിക്കലും ഒറ്റപ്പെടില്ലെന്നും ഇസ്രായേലിന്‍റെ വഞ്ചനപരമായ ആക്രമണം ജി.സി.സി രാജ്യങ്ങൾ തമ്മിലുള്ള ഐക്യത്തെ ശക്​തിപ്പെടുത്തുമെന്നും​ നേതാക്കൾ വ്യക്തമാക്കിയിട്ടുണ്ട്​​​. അന്താരാഷ്ട്ര പെരുമാറ്റച്ചട്ടങ്ങളെ ഇസ്രായേലിന്‍റെ കാടത്തനിയമത്തിന് ഒരിക്കലും​ നിയന്ത്രിക്കാനാവില്ലെന്നും അൻവർ ഗർഗാഷ്​ പറഞ്ഞു.

ജി.സി.സി രാജ്യങ്ങൾ തമ്മിലുള്ള സംയുക്ത പ്രതിരോധ കരാർ സജീവമാക്കുമെന്നാണ്​​ അടിയന്തര അറബ്​-ഇസ്​ലാമിക്​ ഉച്ചകോടിയുടെ സമാപനത്തിൽ ഗൾഫ്​ രാജ്യങ്ങൾ ​പ്രതിജ്ഞയെടുത്തിരിക്കുന്നത്​​. അതേസമയം, ദോഹ ആക്രമണത്തിന്​ പിന്നാലെ യു.എ.ഇ പ്രസിഡന്‍റ്​ ശൈഖ്​ മുഹമ്മദ്​ ബിൻ സായിദ്​ ആൽ നഹ്​യാൻ ഖത്തറി​ലെത്തി ​നേരിട്ട്​ പിന്തുണ അറിയിച്ചിരുന്നു. കൂടാതെ യു.എ.ഇയിലെ ഇസ്രായേൽ ഡെപ്യൂട്ടി അംബാസഡറെ യു.എ.ഇ വിളിച്ചുവരുത്തി പ്രതിഷേധം അറിയിക്കുകയും ചെയ്തിരുന്നു.