ഇറാൻ ആക്രമണം: തെളിവ്​ ​ശേഖരിക്കാൻ ദേശീയ സമിതിക്ക്​ രൂപം നൽകി യു.എ.ഇ

ദുബൈ: മേഖലയിൽ സംഘർഷങ്ങൾ തുടരുന്ന സാഹചര്യത്തിൽ രാജ്യത്തിന്​ നേരെ ഇറാൻ നടത്തുന്ന ആക്രമണങ്ങളും അന്താരാഷ്ട്ര കുറ്റകൃത്യങ്ങളും അതുണ്ടാക്കിയ നാശനഷ്ടങ്ങളും നിയമപരമായി രേഖപ്പെടുത്താൻ ദേശീയ സമിതിക്ക്​ രൂപം നൽകി യു.എ.ഇ. രാജ്യത്തെ നിയമങ്ങളും സാ​ങ്കേതിക മാനദണ്ഡങ്ങളും അനുസരിച്ച്​​ വിശ്വസനീയമായ രീതിയിൽ തെളിവുകൾ ശേഖരിക്കുകയാണ്​ ലക്ഷ്യം. യു.എ.ഇ അറ്റോർണി ജനറലായിരിക്കും സമിതി അധ്യക്ഷൻ. യു.എ.ഇ വൈസ്​ പ്രസിഡന്‍റും ഉപപ്രധാനമന്ത്രിയും പ്രസിഡൻഷ്യൽ കോർട്ട്​ ചെയർമാനുമായ ശൈഖ്​ മൻസൂർ ബിൻ സായിദ്​ ആൽ നഹ്​യാൻ ദേശീയ സമിതി രൂപവത്​കരിക്കുന്നതിന്​ അംഗീകാരം നൽകിയിട്ടുണ്ട്​​.

ഇറാന്‍റെ ഭാഗത്തു നിന്നുള്ള ആക്രമണങ്ങൾ രാജ്യത്തെ അടിസ്ഥാന സൗകര്യങ്ങളേയും പൗരൻമാർ, താമസക്കാർ, സന്ദർശകർ എന്നിവരേയും എത്രമാത്രം ബാധിച്ചുവെന്ന്​ വിശ്വസനീയമായ തെളിവുകളുടെ അടിസ്ഥാനത്തിൽ കൃത്യമായി രേഖപ്പെടുത്തുകയാണ്​ സമിതിയുടെ ചുമതല. ഇതിനായി ഏത്​ ദേശീയ, അന്തർദേശീയ വിദഗ്​ധരുടെയും സഹായം തേടാൻ സമിതിക്ക്​ അധികാരമുണ്ടാകും. കൂടാതെ ഇറാന്‍റെ ഭാഗത്തു നിന്നുണ്ടാകുന്ന എല്ലാ ആക്രമണങ്ങളും സൈനിക നടപടികളും നിരീക്ഷിക്കാനും രേഖപ്പെടുത്താനുമുള്ള വിശാലമായ അധികാരങ്ങളും സമിതിക്ക്​ നൽകിയിട്ടുണ്ട്​.

രാജ്യത്തെ ​​പ്രധാന മന്ത്രാലയങ്ങളുടെയും തദ്ദേശ സ്ഥാപനങ്ങളുടെയും ​​പ്രതിനിധികൾ സമിതിയിൽ അംഗങ്ങളായിരിക്കും. തെളിവുകളുടെ സമഗ്രത ഉറപ്പുവരുത്താൻ സാമ്പത്തിക, സാ​ങ്കേതിക, സുരക്ഷ, നിയമ മന്ത്രാലയങ്ങളിലെ ഉന്നത ഉദ്യോഗസ്ഥരെയും സമിതിയിൽ ഉൾപ്പെടുത്തും. ഭരണഘടന വ്യവസ്ഥകൾ, രാജ്യാന്തര കുറ്റകൃത്യങ്ങൾ രേഖപ്പെടുത്തുന്നതിന്​ അന്താരാഷ്ട്ര തലത്തിൽ അംഗീകരിക്കപ്പെട്ട മാനദണ്ഡങ്ങൾ, നിയമങ്ങൾ എന്നിവ പാലിക്കാൻ സമിതി ബാധ്യസ്ഥമാണ്​.

സംഭവങ്ങളുടെ സമഗ്രവും സുസ്ഥിരവുമായ വിവരണം ഉറപ്പാക്കുന്നതിനായി ആക്രമണങ്ങളുടെ സ്വഭാവം, സമയം, സാഹചര്യങ്ങൾ എന്നിവ സൂക്ഷ്മതയോടെ വിലയിരുത്തണം. കൂടാതെ, അംഗീകൃതമായ സാ​ങ്കേതിക രീതികൾ ഉപയോഗിച്ച്​ ആക്രമണങ്ങളെ തുടർന്നുണ്ടായ സാമ്പത്തികവും മാനുഷികവും ഭൗതികവുമായ നാശനഷ്ടങ്ങൾ കണ്ടെത്തുകയും വിലയിരുത്തുകയും ചെയ്യണം.

വിശ്വസനീയവും ഔദ്യോഗികവുമായ വിവരങ്ങളുടെയും രേഖകളുടെയും അടിസ്ഥാനത്തിൽ മരിച്ചവരുടെയും പരിക്കേറ്റവരുടെയും വിവരങ്ങൾ കൃത്യമായി രേഖപ്പെടുത്താനുള്ള ചുമതലയും സമിതിക്കാണ്​. രേഖകളുടെ സമഗ്രത ഉറപ്പാക്കുന്നതിനും കൃത്രിമത്വം തടയുന്നതിനും ഭൗതികവും ഡിജിറ്റലുമായ തെളിവുകൾ ശരിയായ രീതിയിൽ​ സൂക്ഷിക്കുന്നതിനും നൂതന സാങ്കേതിക സംവിധാനങ്ങളിലൂടെയായിരിക്കും ഡാറ്റാബേസ് കൈകാര്യം ചെയ്യുക.