ജെ.എസ്​.കെ സിനിമ റിലീസിനായി ഇടപെട്ടിരുന്നു ​-സുരേഷ്​ ഗോപി

ദുബൈ: സെൻസർ ബോർഡിന്‍റെ നടപടി മൂലം വിവാദത്തിലായ ജാനകി വി വേഴ്​സസ്​ സ്​റ്റേറ്റ്​ ഓഫ്​ കേരള (ജെ.എസ്​.കെ) സിനിമയുടെ റിലീസിനുവേണ്ടി പൊതുജനമറിയാത്ത ചില ഇടപെടലുകൾ നടത്തിയിരുന്നതായി കേന്ദ്ര സഹമന്ത്രിയും സിനിമയിലെ നായകനുമായ സുരേഷ്​ ഗോപി. സിനിമയുടെ നിർമാതാവോ മാധ്യമ പ്രവർത്തകരോ പൊതുജനമോ അറിയാൻ പാടില്ലാത്ത തരത്തിലായിരുന്നു ഇടപെടൽ. ഉന്നത തലത്തിൽ ചർച്ച ചെയ്ത്​ ചില​ തിരുത്തലുകളിലേക്ക്​ നയിക്കുന്നതിന്​ സുഹൃത്തുക്കളായ പ്രധാന നേതാക്കളുമായി സംസാരിച്ചു​. എന്നാൽ, മന്ത്രിയെന്ന നിലയിൽ ഔദ്യോഗിക സംവിധാനത്തിൽ സ്വാധീനം ചെലുത്തിയിട്ടില്ലെന്നും അദ്ദേഹം പറഞ്ഞു.

സിനിമ റിലീസുമായി ബന്ധപ്പെട്ട്​ യു.എ.ഇയിൽ നടത്തിയ വാർത്ത സമ്മേളനത്തിലാണ്​ അദ്ദേഹം ഇക്കാര്യം വെളിപ്പെടുത്തിയത്​. മന്ത്രിയെന്ന നിലയിൽ ഇ​ടപെട്ടിരുന്നെങ്കിൽ അത്​ അഴിമതിയായാണ്​ വിലയിരുത്തുക. സിനിമയിൽ സെൻസറിങ്​ വേണമെന്ന്​ തോന്നിയിട്ടില്ല. 96 ഇടങ്ങളിൽ സെൻസറിങ്​ വേണ്ടിവരുമെന്നാണ്​ പറഞ്ഞിരുന്നത്​. പക്ഷേ, രണ്ടിടത്ത്​ മാത്രമാണ്​ സെൻസറിങ്​ നടത്തിയത്​. ഇതൊരു പ്രോപഗണ്ട സിനിമ അല്ലെന്നും അദ്ദേഹം കൂട്ടിച്ചേർത്തു.

പബ്ലിസിറ്റിക്കുവേണ്ടിയാണ്​ ഇത്തരമൊരു വിവാദമുണ്ടാക്കിയതെന്ന ആരോപണം തെറ്റാണെന്ന്​ സിനിമയുടെ സംവിധായകൻ പ്രവീൺ നാരായണൻ പറഞ്ഞു. സിനിമ ചിത്രീകരണം പൂർത്തിയായി റിലീസിങ്ങിന്‍റെ തൊട്ടുമുമ്പ്​ മാത്രമാണ്​​ വിവാദമുണ്ടായത്​. അത്​ ഒരിക്കലും വിചാരിച്ചതല്ല. അത്​ സിനിമയുടെ പബ്ലിസിറ്റിക്കു​ ​വേണ്ടിയാണുണ്ടാക്കിയെന്ന്​ പറയുന്നതിൽ വിഷമമുണ്ടെന്നും അദ്ദേഹം പറഞ്ഞു.കോസ്‌മോസ് എന്‍റർടൈൻമെന്‍റ്​സിന്‍റെ ബാനറിലാണ് ചിത്രം നിർമിച്ചത്. സേതുരാമൻ നായർ കാങ്കോൽ സഹനിർമ്മാതാവാണ്. ഫാർസ് ഫിലിംസാണ് ചിത്രത്തിന്‍റെ ഗൾഫിലെ വിതരണക്കാർ. നിർമാതാവ്​ ജെ. ഫാനിന്ദ്രകുമാർ, നടൻ അസ്​ഗർ അലി എന്നിവരും വാർത്ത സമ്മേളനത്തിൽ പ​ങ്കെടുത്തു.