അന്താരാഷ്​ട്ര ആസ്​ട്രോനോട്ടിക്കൽ കോൺഗ്രസ്​ ദുബൈയിൽ

ദുബൈ: 71 ാമത്​ അന്താരാഷ്​ട്ര ആസ്​ട്രോനോട്ടിക്കൽ കോൺഗ്രസ്​ 2020ൽ ദുബൈയിൽ നടക്കും. ആദ്യമായാണ്​ ഒരു അറബ്​ രാഷ്​ട്രം ഇൗ സമ്മേളനത്തിന്​ ആതിഥ്യം വഹിക്കുന്നത്. സമ്മേളന വേദി നിശ്ചയിക്കാൻ അന്താരാഷ്​ട്ര ആസ്​ട്രോനോട്ടിക്കൽ ഫെഡറേഷൻ നടത്തിയ തെരഞ്ഞെടുപ്പിൽ വിജയിച്ചാണ്​ ദുബൈ അർഹത നേടിയത്​. സമ്മേളന വേദിയായി ദുബൈ തെരഞ്ഞെടുക്കപ്പെട്ടത്​ ബഹിരാകാശ ഗവേഷണ രംഗത്ത്​ യു.എ.ഇ നേടിയ വളർച്ചക്കുള്ള അംഗീകാരമാണെന്ന്​ ദുബൈ കിരീടാവകാശിയും ദുബൈ എക്​സിക്യൂട്ടീവ്​ കൗൺസിൽ ചെയർമാനുമായ ശൈഖ്​ ഹംദാൻ ബിൻ മുഹമ്മദ്​ ബിൻ റാശിദ്​ ആൽ മക്തൂം ട്വിറ്ററിൽ അറിയിച്ചു. ദുബൈയെ സമ്മേന വേദിയാക്കാൻ ശ്രമം നടത്തുന്നുണ്ടെന്ന്​ മുഹമ്മദ്​ ബിൻ റാഷിദ്​ ബഹിരാകാശ കേന്ദ്രം അധികൃതർ സൂചിപ്പിച്ചിരുന്നു.

യു.എ.ഇയുടെ ബഹിരാകാശ പദ്ധതികളെപ്പറ്റിയും അറബ്​, ഇസ്​ലാമിക രാജ്യങ്ങളിൽ ഇൗ സമ്മേളനം നടത്തേണ്ടതി​​െൻറ പ്രാധാന്യത്തെക്കുറിച്ചും ബോധ്യപ്പെടുത്താൻ കഴിഞ്ഞതാണ്​ തീരുമാനം ദുബൈക്ക്​ അനുകൂലമാക്കിയത്​​. സമ്മേളം യു.എ.ഇയുടെയും മേഖലയുടെയും ബഹിരാകാശ രംഗത്ത്​ ഗുണകരമായ മാറ്റമുണ്ടാക്കുമെന്നാണ്​ കണക്കുകൂട്ടൽ.

ഉപഗ്രഹങ്ങൾ, ബഹിരാകാശ വാഹനം, റോക്കറ്റ്​  പ്രൊപ്പൽഷൻ സിസ്​റ്റം തുടങ്ങി ബഹിരാകാശവുമായി ബന്ധപ്പെട്ട വിഷയങ്ങളിലെ നൂതന കണ്ടത്തലുകളും ആശയങ്ങളും സമ്മേളനത്തിൽ അവതരിപ്പിക്കപ്പെടും. 70 രാജ്യങ്ങളിൽ നിന്നായി 5000 ശാസ്​ത്രജ്ഞർ സമ്മേളനത്തിൽ പ​െങ്കടുക്കും.