ജോലിക്കിടെ ഉറങ്ങിയത് മുംബൈയില്‍, ഇറങ്ങിയത് അബൂദബിയില്‍

അബൂദബി: ജോലിക്കിടെ ഒന്ന് കണ്ണടച്ചു പോയതാണ്, പക്ഷെ, വിമാനത്തിലെ കാര്‍ഗോ ചുമട്ടു തൊഴിലാളിക്ക് കിട്ടിയത്​ എട്ടി​െൻറ പണി. ഉറങ്ങിയത് മുംബയിലാണെങ്കിലും ഇറങ്ങിയത്​ അബൂദബിയിലാണ്. ഇന്‍ഡിഗോ വിമാനത്തിലെ കാര്‍ഗോ വിഭാഗം ജീവനക്കാരനാണ് വിമാനത്തിലെ കാർഗോ കംപാർട്ട്​മെൻറിലിരുന്ന്​ ഉറങ്ങിപ്പോയത്​.

കാർഗോ എല്ലാം കയറ്റിയ ശേഷം ഇത്​ അടച്ചെങ്കിലും ജീവനക്കാരൻ അറിഞ്ഞില്ല. എന്നാൽ, വിമാനം പറന്നുയർന്നതോടെ ഉറക്കത്തിൽ നിന്നെഴുന്നേറ്റെങ്കിലും കാര്യമുണ്ടായില്ല. അബൂദബിയിൽ എത്തിയപ്പോഴാണ്​ വിമാനജീവനക്കാർ പോലും വിവരം അറിയുന്നത്​.

അബൂദബിയില്‍ എത്തിയ കാര്‍ഗോ ജീവനക്കാരനെ വൈദ്യപരിശോധനയ്ക്കു വിധേയനാക്കുകയും ഇതേ വിമാനത്തില്‍ തന്നെ മുംബൈയിലേക്ക് മടക്കി അയക്കുകയും ചെയ്തു. സംഭവത്തിൽ അന്വേഷണം പ്രഖ്യാപിച്ചിട്ടുണ്ട്​.