നാട്ടുകാരുടെ കൂട്ടായ്​മ താങ്ങായി; സജു നാടണഞ്ഞു

ദുബൈ: ജോലി നഷ്​ടപ്പെട്ട്​ ദുരിതത്തിലായ മലയാളിയെ നാട്ടിലെത്തിക്കാൻ സഹായിച്ച്​ കൊട്ടിയം പ്രവാസി ​കൂട്ടായ്​മ. കൊല്ലം കൊട്ടിയം പുതുവൽവീട്ടിൽ സജു പി. ജോണി​നെയാണ്​ നാട്ടുകാരുടെ കൂട്ടായ്​മ നാടണയാൻ സഹായിച്ചത്​.

രണ്ടു വർഷം മുമ്പ്​​ റാസൽഖൈമയിലെ കമ്പനിയിലേക്കാണ്​ അദ്ദേഹം ജോലിക്കായി എത്തിയത്​. എന്നാൽ, ജോലിസംബന്ധമായ ചില പ്രശ്​നങ്ങൾമൂലം സ്​ഥാപനം വിട്ടു. സ്ഥിരംജോലി ലഭിക്കാതെ വന്നതോടെ ജീവിതം ദുരിതപൂർണമായി.

രണ്ട് വർഷത്തെ വിസ കാലാവധി കഴിയുകയും പാസ് പോർട്ട് ആദ്യ കമ്പനിയിൽ ആയതിനാൽ നാട്ടിൽ പോകാൻ കഴിയാത്ത അവസ്​ഥയായി. കിടക്കാൻ റൂമോ ഭക്ഷണമോ ഇല്ലാത്ത അവസ്ഥയായതോടെ ഉറക്കം റാസൽഖൈമയിലെ തെരുവുകളിലുമായി. ഇദ്ദേഹത്തെ സഹായിക്കണമെന്ന്​ അഭ്യർഥിച്ച് സമൂഹ മാധ്യമങ്ങളിൽ വന്ന വിഡിയോ പോസ്​റ്റ്​ കണ്ട്​​​ കൊട്ടിയം പ്രവാസി വാട്സ്​ആപ് കൂട്ടായ്മ (കെ.പി.കെ) ഭാരവാഹികൾ ഇടപെടുകയും അദ്ദേഹത്തിന് താമസ, ഭക്ഷണ സൗകര്യങ്ങൾ ഏർപ്പാടാക്കുകയും ചെയ്തു. പിന്നീട് അദ്ദേഹത്തെ നാട്ടിലേക്ക് അയക്കാനുള്ള ശ്രമങ്ങളുമായി മുന്നോട്ടുപോയി. അദ്ദേഹത്തി​െൻറ പഴയ സ്പോൺസറെ കണ്ടെത്തി പാസ്പോർട്ട് തിരിച്ചുവാങ്ങുകയും നാട്ടിലേക്ക്​ പോകാനുള്ള പേപ്പറുകൾ ശരിയാക്കുകയും ചെയ്​തു.

തിങ്കളാഴ്ച തിരുവനന്തപുരത്തേക്കുള്ള വിമാനത്തിൽ നാട്ടിലേക്കയച്ചു. തിരുവനന്തപുരം എയർപോർട്ടിൽനിന്ന്​ വീടുവരെ എത്തിക്കാനുള്ള ടാക്സിയും കൂട്ടായ്മ ഏർപ്പെടുത്തി. കൊട്ടിയം പരിസരപ്രദേശത്തുള്ള 155 അംഗങ്ങൾ അടങ്ങിയതാണ് കെ.പി.കെ. തുടർനാളുകളിൽ സമൂഹത്തിനും മറ്റ് ബുദ്ധിമുട്ട് അനുഭവിക്കുന്നവർക്കും കൂട്ടായ്മയുടെ പരിധിക്കുള്ളിൽനിന്ന് സഹായം ചെയ്ത് മുന്നോട്ടുപോകാനാണ് തീരുമാനമെന്നും കൂട്ടായ്മ സെക്രട്ടറി ബിജു നടേശൻ അറിയിച്ചു.