ഷാർജ സുസ്ഥിരതാ അവാർഡിൽ ഇന്ത്യ ഇന്‍റർനാഷനൽ സ്കൂളിന്​ പുരസ്കാരം

ഷാർജ: എൻവയോൺമെന്റ് ആൻഡ് പ്രൊട്ടക്റ്റഡ് ഏരിയ അതോറിറ്റി (ഇ.പി.എ.എ) ഷാർജ സംഘടിപ്പിച്ച പതിനൊന്നാമത് ഷാർജ സുസ്ഥിരതാ അവാർഡിൽ ഇന്ത്യ ഇന്‍റർനാഷണൽ സ്കൂൾ ഷാർജ മികച്ച സ്കൂൾ വിഭാഗത്തിനുള്ള അവാർഡ് നേടി. ദേശീയതല മത്സരത്തിൽ യു.എ.ഇയിലെ ഏഴ് എമിറേറ്റുകളിൽ നിന്നുള്ള 196 പൊതു- സ്വകാര്യ-വിദേശ സ്‌കൂളുകളിൽ നിന്നും കേന്ദ്രങ്ങളിൽ നിന്നുമുള്ള 311 അപേക്ഷകരുണ്ടായിരുന്നു. 13 വിഭാഗങ്ങളിൽ നിന്നും 7ഡൊമെയ്‌നുകളായാണ് മത്സരം സംഘടിപ്പിച്ചത്.

ഇന്ത്യ ഇന്‍റർനാഷണൽ സ്‌കൂളിലെ 12-ാം ക്ലാസ് വിദ്യാർഥികളുടെയും അധ്യാപകരായ നസീഫ് ജമാൽ, സ്വപ്‌ന ആദർശ്, ഫവാസ് അബ്ദുൾ സത്താർ, സ്റ്റുഡന്‍റ്​ വെൽഫെയർ ഓഫീസർ അയ്ഷത്ത് തൻസീഹ എന്നിവരുടെലും നേതൃത്വത്തിൽ കൃത്രിമബുദ്ധി ഉപയോഗിച്ച് പരിസ്ഥിതി സംരക്ഷണ പദ്ധതിയായ ‘ഇസെഡ്​ ബിൻ’ 4 മാസത്തെ കാലയളവിലാണ് വികസിപ്പിച്ചെടുത്തത്.

അൽ ഖാസിമിയ യൂനിവേഴ്സിറ്റി തിയേറ്ററിൽ ഇ.എ.പി.പി ചെയർപേഴ്സൺ ഹന സെയ്ഫ് അൽ സുവൈദി വിദ്യാർഥികളെ ആദരിച്ചു. സീനിയർ ഡയറക്ടർ ആസിഫ് മുഹമ്മദ്, മാനേജിങ്​ ഡയറക്ടർ സൽമാൻ ഇബ്രാഹിം, അസി. ഡയറക്ടർ സഫ ആസാദ്, പ്രിൻസിപ്പൽ ഡോ. മഞ്ജു റെജി, വൈസ് പ്രിൻസിപ്പൽ ഷിഫാന മുയിസ്, സീനിയർ ലീഡർഷിപ്പ് ടീം എന്നിവർ പ്രോജക്ട് അംഗങ്ങളെ അഭിനന്ദിച്ചു.