വെള്ളത്തിനടിയിലെ ഹോക്കിക്ക്​ ആരാധകരേറുന്നു

അബൂദബി: കോവിഡ് മഹാമാരിയുടെ പ്രതിസന്ധികളെ മറികടന്ന് അബൂദബി വിവിധ വിനോദങ്ങളിലേക്കു തിരിച്ചുവരികയാണ്. വെള്ളത്തിനടിയിലെ ഹോക്കിയാണ് പുതിയ ട്രെന്‍ഡ്. ഈ മല്‍സരങ്ങളുമായി നിരവധി പേരാണ് സജീവമായിരിക്കുന്നത്.

വിദേശരാജ്യങ്ങളിലൊക്കെ ശ്രദ്ധയാകര്‍ഷിക്കുന്ന വേറിട്ട കായികവിനോദമാണ് അബൂദബിയിലും ചൂടുപിടിക്കുന്നത്. ആറുപേരാണ് രണ്ടുടീമുകളായി മല്‍സരിക്കുന്നത്.

നീളംകുറഞ്ഞ ഹോക്കി സ്​റ്റിക്കാണ് ഉപയോഗിക്കുന്നത്. വെള്ളത്തിനടിയിലെ സഞ്ചാരം സുഗമമാക്കുന്നതിനായി 'തുഴച്ചില്‍ ഉപകരണം' കാലിലണിഞ്ഞും ഓക്‌സിജന്‍ മാസ്‌ക് ധരിച്ചുമാണ് കളിക്കാരുടെ ഏറ്റുമുട്ടല്‍.

മെയ് വഴക്കവും നീന്തല്‍ വൈദഗ്ധ്യവും കളിമികവുമൊക്കെ ഒത്തുചേര്‍ന്നൊരു അഭ്യാസിക്കു മാത്രമേ ഈ ഹോക്കികളി വഴങ്ങൂ എന്നത്​ ഈ മല്‍സരത്തെ വേറിട്ടതാക്കുന്നു.