നാലു മാസത്തിനുള്ളിൽ ദുബൈ കസ്റ്റംസ്​ പരാജയപ്പെടുത്തിയത്​ 936 മയക്കുമരുന്ന്​ കടത്ത്​ ശ്രമങ്ങൾ

ദുബൈ: ആംഫെറ്റാമൈൻ അടങ്ങിയ കോഫി ക്രീമറിന്‍റെ 2968 പെട്ടികൾ, യാത്രക്കാർ വിഴുങ്ങി കൊണ്ടുവന്ന 935 ഗ്രാം തൂക്കമുള്ള 97 ഹെറോയ്​ൻ കാപ്​സ്യൂളുകൾ, ഉണക്കിയ കുരുമുളകിന്‍റെ മറവിൽ കടത്താൻ ശ്രമിച്ച 42 കിലോ മരിജുവാന- 2022ലെ ആദ്യ നാലു മാസത്തിനിടയിൽ ദുബൈ കസ്റ്റംസ്​ പരാജയപ്പെടുത്തി 936 മയക്കുമരുന്ന്​ കടത്ത്​ ശ്രമങ്ങളിൽ ചിലവയാണിത്​. കരമാർഗവും കടൽമാർഗവും വ്യോമമാർഗവും ദുബൈ പോർട്ടുകളിലൂടെ രാജ്യത്തേക്ക്​ മയക്കുമരുന്ന്​ കടത്താനുള്ള ശ്രമങ്ങളാണ്​ ദുബൈ കസ്റ്റംസ്​ പരാജയപ്പെടുത്തിയത്​.

കഴിഞ്ഞ വർഷം ഇതേ കാലയളവിൽ ഇത്​ 558 ആയിരുന്നു. ട്രമഡോൾ ഗുളികകൾ, കാപ്​റ്റജൻ, ഓപിയം, ഹെറോയ്​ൻ, കഞ്ചാവ്​, മരിജുവാന തുടങ്ങിയവ കടത്താനുള്ള നിരവധി ശ്രമങ്ങളാണ്​ ദുബൈ കസ്റ്റംസ്​ തടഞ്ഞത്​.

2022 ജനുവരിക്കും ഏപ്രിലിനുമിടയിൽ 222 മയക്കുമരുന്ന്​ കടത്ത്​ ശ്രമങ്ങളാണ്​ പാസഞ്ചർ ഓപറേഷൻസ്​ ഡിപാർട്ട്​മെന്‍റ്​ തടഞ്ഞത്​. കഴിഞ്ഞ വർഷം ഇതേ കാലയളവിൽ അത്​ 198 ആയിരുന്നു. മറ്റ്​ വിഭാഗങ്ങളിലേത്​ ഇനി പറയും വിധമാണ്​ (കഴിഞ്ഞ വർഷത്തെ കണക്ക്​ ​ബ്രാക്കറ്റിൽ): ഇൻലാൻഡ്​ കസ്റ്റംസ്​ സെന്‍റേഴ്​സ്​ മാനേജ്​മെന്‍റ്​- 501 (32), എയർ കാർഗോ സെന്‍റേഴ്​സ്​ മാ​നേജ്​മെന്‍റ്​- 207 (325), സീ കസ്റ്റംസ്​ സെന്‍റേ്​ഴ്​സ്​ മാനേജ്​മെന്‍റ്​ -6 (3). 'മയക്കുമരുന്നിൽ നിന്നും സമൂഹത്തെ രക്ഷിക്കുകയെന്ന ലക്ഷ്യത്തോടെ ദുബൈ കസ്റ്റംസ്​ നടപ്പാക്കുന്ന പഞ്ചവത്സര പദ്ധതിയുടെ ഭാഗമായിട്ടാണ്​ ഈ പരിശോധനകളെല്ലാം നടത്തിയതും വിജയിച്ചതും. ദേശീയ ദൗത്യം പൂർത്തീകരിക്കുന്നതിനുള്ള ഞങ്ങളുടെ പ്രതിബദ്ധതയുടെ ഭാഗമാണത്​' -ദുബൈ കസ്റ്റംസ്​ ഡയറക്​ടർ ജനറലും പോർട്ട്​സ്​, കസ്​റ്റംസ്​ ആൻഡ്​ ഫ്രീസോൺ കോർപറേഷൻ സി.ഇ​.ഒയുമായ അഹമ്മദ്​ മെഹ്​ബൂബ്​ മുസ്സബിഹ്​ പറഞ്ഞു.

യു.എ.ഇ സുപ്രീം കൗൺസിലംഗവും വൈസ്​ പ്രസിഡന്‍റും ദുബൈ ഭരണാധികാരിയുമായ ശൈഖ്​ മുഹമ്മദ്​ ബിൻ റാശിദ്​ ആൽ മക്​തുമിന്‍റെ മാർഗനിർദേശമനുസരിച്ച്​ ദുബൈ കൗൺസിൽ ഫൊർ ബോർഡർ ക്രോസിങ്​ പോയന്‍റ്​സ്​ സെക്യൂരിറ്റി ആവിഷ്കരിച്ച പരിപാടികൾക്ക്​ പൂർണ പിന്തുണ നൽകിയാണ്​ നിരോധിച്ച മയക്കുമരുന്ന്​ രാജ്യത്തേക്ക്​ പ്രവേശിക്കുന്നതിനെ ദുബൈ കസ്റ്റംസ്​ തടയുന്നതെന്ന്​ അദ്ദേഹം പറഞ്ഞു.

'ലോകത്തിലെ നേതൃനിരയിലേക്ക്​ ദുബൈ കുതിക്കുന്ന വേളയിൽ, മയക്കുമരുന്ന്​ കടത്ത്​ തടയുന്നതിലും അതിന്‍റെ ആരോഗ്യ-സാമൂഹിക ദൂഷ്യങ്ങളെ കുറിച്ച്​ ബോധവത്​കരിക്കുന്നതിലും ദുബൈ അന്താരാഷ്​ട്ര തലത്തിൽ മാതൃകയാകുകയാണ്​. കസ്റ്റംസ്​ പരിശോധനയുടെ മികച്ച സംവിധാനങ്ങളെയും കാര്യക്ഷമതയുള്ള ഉദ്യോഗസ്ഥരെയും ഉപയോഗിച്ചാണ്​ ഇത്​ സാധ്യമാകുന്നത്​.

സംശയാസ്പദമായ ഏത്​ ചരക്കുനീക്കവും നിരീക്ഷിക്കുന്നതിനുള്ള സംവിധാനം ദുബൈ കസ്റ്റംസിനുണ്ട്​. ആഗോളതലത്തിൽ തന്നെ കസ്​റ്റംസ്​ പരിശോധനയിൽ ഒന്നാമതെത്തുന്നതിന്​ രൂപം കൊടുത്ത ഡിപാർട്ട്​മെന്‍റിന്‍റെ 2021-2026 കർമപദ്ധതി അനുസരിച്ചുള്ള പ്രവർത്തനങ്ങളാണ്​ നടപ്പാക്കുന്നത്​' -അദ്ദേഹം പറഞ്ഞു. സംശയാസ്പദമായ എല്ലാ ചരക്കുനീക്കവും കണ്ടെത്തി, മുൻകൂട്ടി മുന്നറിയിപ്പ്​ നൽകുന്നതിന്​ സ്മാർട്ട്​ റിസ്ക്​ എൻജിൻ സംവിധാനമാണ്​ ദുബൈ കസ്റ്റംസിനെ സഹായിക്കുന്നത്​.

കണ്ടയ്​നറുകൾ പരിശോധിക്കാനുള്ള അത്യാധുനിക സംവിധാനങ്ങൾ അടക്കമുള്ള സൗകര്യങ്ങൾ ദുബൈ കസ്റ്റംസിനുണ്ട്​. സഞ്ചരിക്കുന്ന ട്രക്കുകളെ വരെ പരിശോധിക്കാൻ സ്മാർട്ട്​ റിസ്ക്​ എൻജിൻ സംവിധാനത്തിലൂ​ടെ കഴിയും. മണിക്കൂറിൽ 160 ട്രക്കുകളെ പരിശോധിക്കാനാണ്​ സാധിക്കുക.