തൊഴിൽ നൽകാൻ മാനവ വിഭവശേഷി വികസന കൗൺസിൽ

ദുബൈ: സ്വദേശികൾക്ക് അനുയോജ്യമായ തൊഴിലവസരങ്ങൾ സ്വകാര്യമേഖലയിൽ കണ്ടെത്താൻ ദുബൈയിൽ മാനവ വിഭവശേഷി വികസന കൗൺസിൽ രൂപവത്​കരിക്കുന്നു.

യു.എ.ഇ വൈസ്​ പ്രസിഡൻറും പ്രധാനമന്ത്രിയും ദുബൈ ഭരണാധികാരിയുമായ ശൈഖ്​ മുഹമ്മദ്​ ബിൻ റാശിദ്​ ആൽ മക്​തൂമാണ്​ കൗൺസിൽ രൂപവത്​കരണത്തിന്​ ഉത്തരവിട്ടത്​. വികസന പ്രക്രിയയുടെ വേഗം വർധിപ്പിക്കുക, എമിറാത്തി മാനവ വിഭവശേഷി വികസന സംവിധാനം നവീകരിക്കുക, സുപ്രധാനവും തന്ത്രപ്രധാനവുമായ മേഖലകളിൽ ഇമറാത്തികളുടെ പങ്കാളിത്തം ഉയർത്തുക എന്നിവയാണ്​ ലക്ഷ്യങ്ങൾ​.

കൗൺസിലിൽ പൊതു-സ്വകാര്യ മേഖലകളിലെ പ്രതിനിധികൾ അംഗങ്ങളാകും.ഉത്തരവ്​ നടപ്പാക്കുന്നതി​െൻറ ഭാഗമായി ദുബൈ കിരീടാവകാശിയും എക്​സിക്യൂട്ടിവ്​ കൗൺസിൽ ചെയർമാനുമായ ശൈഖ്​ ഹംദാൻ ബിൻ മുഹമ്മദ്​ ബിൻ റാശിദ്​ ആൽ മക്​തൂം കൗൺസിൽ ചെയർമാനെയും അംഗങ്ങളെയും പ്രഖ്യാപിച്ചു. എൻജി. സുൽത്താൻ ബിൻ സഈദ്​ അൽ മൻസൂരിയാണ്​ ചെയർമാൻ. എമിറേറ്റ്​സ്​ എൻ.ബി.ഡി, എമിറേറ്റ്​സ്​ എയർലൈൻ, അൽ ഫുത്തൈം ഗ്രൂപ്​ എന്നിവയിൽനിന്ന്​ ഓരോ പ്രതിനിധികളും കമ്മിറ്റിയിലുണ്ടാകും.

എമിറാത്തി മാനവ വിഭവശേഷി വികസിപ്പിക്കാനും സ്വദേശിവത്​കരണ നിരക്ക് ഉയർത്താനും പദ്ധതികളും തന്ത്രങ്ങളും ആസൂത്രണം ചെയ്യാൻ​ അധികാരം ദുബൈ സർക്കാർ മാനവവിഭവശേഷി വകുപ്പിനായിരിക്കും. സ്വകാര്യമേഖലയിലെ ഉൾപ്പെടെ വിദ്യാഭ്യാസ-തൊഴിൽ പരിശീലന സ്ഥാപനങ്ങൾ മാനവ വിഭവശേഷി വികസന കൗൺസിലുമായി പൂർണമായും സഹകരിക്കാനും അത് ആവശ്യപ്പെടുന്ന ഡാറ്റ, സ്ഥിതിവിവരക്കണക്കുകൾ, വിവരങ്ങൾ, പഠനങ്ങൾ എന്നിവ നൽകാനും ഉത്തരവിലുണ്ട്​.