ഹൂതി ​ആക്രമണം: യു.എൻ രക്ഷാസമിതി വിളിക്കാൻ യു.എ.ഇ കത്ത്​ നൽകി

ദുബൈ: അബൂദബിയിലെ രണ്ട്​ കേന്ദ്രങ്ങളിൽ യമനിലെ ഹൂതികൾ നടത്തിയ ആക്രമണത്തെക്കുറിച്ച്​ ചർച്ച ചെയ്യാൻ യു.എൻ രക്ഷാസമിതി യോഗം വിളിക്കണമെന്നാവശ്യപ്പെട്ട്​ യു.എ.ഇ കത്ത്​ കൈമാറി. രക്ഷാസമിതിയുടെ ജനുവരി മാസത്തെ അധ്യക്ഷത അലങ്കരിക്കുന്ന നോർവേ പ്രതിനിധിക്കാണ്​ കത്ത് കൈമാറിയത്​. ഹൂതി ആക്രമണത്തെ അപലപിക്കുന്ന കത്ത്​, സിവിലിയൻ കേന്ദ്രങ്ങളെ ലക്ഷ്യം വെച്ചുള്ള ആക്രമണങ്ങൾ കടുത്ത അന്താരാഷ്ട്ര ലംഘനമാണെന്ന്​ ചൂണ്ടിക്കാട്ടി. ഇക്കാരണത്താൽ ഹൂതി ആക്രമണത്തെ ഒറ്റ​ക്കെട്ടായി രക്ഷാസമിതി തള്ളണ​മെന്നാണ്​ യു.എ.ഇയുടെ ആവശ്യം.യു.എന്നിലെ യു.എ.ഇ അംബാസഡറും സ്ഥിരം പ്രതിനിധിയുമായ ലന നുസൈബയാണ്​ കത്ത്​ കൈമാറിയത്​. മരിച്ചവരുടെ കുടുംബങ്ങളോട് അനുശോചനം രേഖപ്പെടുത്തുകയും പരിക്കേറ്റവർ വേഗത്തിൽ സുഖം പ്രാപിക്കട്ടെയെന്ന് ആശംസിക്കുകയും ചെയ്യുന്ന കത്തിൽ, മേഖലയിൽ തീവ്രവാദവും അരാജകത്വവും വ്യാപിപ്പിക്കാനുള്ള ഹൂതികളുടെ ശ്രമങ്ങളുടെ തുടർച്ചയാണ് ആക്രമണമെന്ന്​ വ്യക്​തമാക്കുന്നു. ഐക്യരാഷ്ട്രസഭയുടെ ഉപരോധങ്ങൾ ലംഘിച്ച് നിയമവിരുദ്ധമായി നേടിയെടുത്ത സന്നാഹങ്ങൾ ഉപയോഗിച്ചാണ്​ സമാധാനത്തിനും സുരക്ഷക്കും ഭീഷണിയുയർത്താൻ ഹൂതികൾ ശ്രമിക്കുന്നതെന്നും ഇതിൽ പറയുന്നു.നിലവിൽ രക്ഷാസമിതിയിൽ രണ്ടുവർഷത്തെ താൽക്കാലിക ​അംഗം കൂടിയായ യു.എ.ഇയുടെ അപേക്ഷ സ്വീകരിക്കപ്പെടുമെന്നാണ്​ പ്രതീക്ഷിക്കപ്പെടുന്നത്​. അതിനിടെ യു.എൻ ജനറൽ അസംബ്ലി പ്രസിഡന്‍റ്​ അബ്​ദുല്ല ശാഹിദ്​ യു.എ.ഇ വിദേശകാര്യ-അന്താരാഷ്ട്ര സഹകരണ വകുപ്പ്​ മന്ത്രി ശൈഖ്​ അബ്​ദുല്ല ബിൻ സായിദ്​ ആൽ നഹ്​യാനെ ഫോണിൽ വിളിച്ച്​ അനുശോചനം അറിയിച്ചിട്ടുണ്ട്​. നേരത്തെ യു.എൻ സെക്രട്ടറി ജനറൽ അന്‍റോണിയോ ഗുട്ടറസ്​ സംഭവത്തെ അപലപിച്ചിരുന്നു. അതിനിടെ ആക്രമണത്തിൽ പരിക്കേറ്റ്​ ചികിൽസയിലുള്ളവരിലും രണ്ട്​ ഇന്ത്യക്കാരുണ്ടെന്ന്​ അധികൃതർ സ്ഥരീകരിച്ചു. മരിച്ച മൂന്ന്​ പേരിൽ രണ്ടുപേർ ഇന്ത്യക്കാരാണെന്ന്​ നേരത്തെ സ്ഥിരീകരിച്ചിരുന്നു.