മരുന്നിനൊപ്പം മംഗല്യവും,  ആശുപത്രി സ്വപ്​നസാഫല്യവേദിയായി

ദുബൈ:  ബംഗ്ലാദേശുകാരനായ ഷഹാദത്ത്​ ചൗധരിക്ക്​ രോഗശമനത്തിനൊപ്പം മക​​െൻറ വിവാഹവേദി കൂടി ഒരുക്കിയിരിക്കുകയാണ്​ ദുബൈ മൻഖൂറിലെ ആസ്​റ്റർ ആശുപത്രി. ശ്വാസകോശത്തെ ബാധിക്കുന്ന  അക്യൂട്ട് റെസ്പിറേറ്ററി ഡിസ്ട്രസ് സിന്‍ഡ്രോം (എ.ആർ.ഡി.എസ്​) ബാധിച്ച്​ തീവ്ര പരിചരണ വിഭാഗത്തിൽ പ്രവേശിപ്പിക്കപ്പെട്ട ഇദ്ദേഹം അപകടനില തരണം ചെയ്​തെങ്കിലും  വിമാനയാത്രയിൽ ഓക്‌സിജൻ നിലയില്‍ വ്യതിയാനമുണ്ടാവാൻ സാധ്യയുള്ളതിനാൽ കാനഡയിൽ വെച്ച്​ നടത്താൻ നിശ്​ചയിച്ചിരുന്ന മക​​െൻറ വിവാഹത്തിൽ പ​െങ്കടുക്കാൻ തക്ക സാഹചര്യമായിരുന്നില്ല.  ഇൗ ഘട്ടത്തിൽ മകൻ റിബാതും പ്രതിശ്രുത വധു സനയും മുന്നോട്ടുവെച്ച അഭ്യർഥന സ്വീകരിച്ച്​ ആശുപത്രിയിൽ നിക്കാഹിന്​ സൗകര്യമൊരുക്കാൻ  അധികൃതർ സന്നദ്ധത അറിയിക്കുകയായിരുന്നു.  

ആശുപത്രി കോണ്‍ഫറന്‍സ് ഹാളില്‍  രക്ഷിതാക്കളുടെ സാന്നിധ്യത്തില്‍ ലളിതമായ ചടങ്ങായാണ്​ നിക്കാഹ്​ നടത്തിയത്​.  ഒരു കുടുംബത്തെ ഒന്നിച്ചുചേര്‍ക്കാനും  ജീവിതത്തില്‍ എന്നെന്നും ഓര്‍ക്കുന്ന  മുഹൂര്‍ത്തം സമ്മാനിക്കാനും കഴിഞ്ഞതില്‍  സന്തുഷ്​ടരാണെന്ന്​ ആസ്റ്റര്‍ ഹോസ്പിറ്റല്‍ സി.ഇ.ഒയും സ്‌പെഷ്യല്‍ അനെസ്‌തെറ്റിസ്റ്റുമായ ഡോ.ഷെര്‍ബാസ് ബിച്ചു പറഞ്ഞു.ശ്വസകോശത്തി​​െൻറ പ്രധാന ഭാഗങ്ങളെല്ലാം പ്രവര്‍ത്തനരഹിതമാകുന്ന അവസ്​ഥയെ ഡോക്​ടർമാരുടെ അശ്രാന്ത പരിശ്രമവും രോഗിയുടെ സഹകരണവും കൊണ്ടാണ്​ മറികടക്കാനായതെന്ന്​  തീവ്രപരിചരണ വിഭാഗം മേധാവി  ഡോ.അലെയ് തഗ്ഗൂ  വ്യക്തമാക്കി.