അവധി ആഘോഷം; യു.എ.ഇ യിലെ ബീച്ചുകളിലെ സുരക്ഷക്ക്​ കർശന നടപടി

ദുബൈ: റമദാനോടനുബന്ധിച്ച അവധി ദിവസങ്ങളിൽ ബീച്ചുകളിൽ ഉല്ലസിക്കാനെത്തുന്നവർ സുരക്ഷാ മാനദണ്ഡങ്ങൾ കർശനമായി പാലിക്കണമെന്ന്​ ദുബൈ നഗരസഭ അറിയിച്ചു. ബീച്ചുകളിലെ സൂചനാ ബോർഡുകളിൽ നൽകിയിട്ടുള്ള നിർദേശങ്ങൾ പാലിക്കണം. ദുബൈയിലെ എല്ലാ പൊതു ബീച്ചുകളിലും ലൈഫ്​ ഗാർഡുമാരെ വിന്യസിച്ചിട്ടുണ്ട്​. കടലി​​​െൻറ അവസ്​ഥയെക്കുറിച്ച്​ വ്യക്തമായ ധാരണയുള്ള ഇവർക്ക്​ രക്ഷാപ്രവർത്തനത്തിൽ പരിശീലനവും നൽകിയിട്ടുണ്ട്​.  

ഇവരുടെ നിർദേശങ്ങളും സന്ദർശകർ പാലിക്കണം. വലിയ തിരയുള്ളപ്പോഴും പാറക്കെട്ടുകൾക്ക്​ സമീപവും നീന്തുന്നത്​ ഒഴിവാക്കണം. സുരക്ഷാ ജീവനക്കാരുടെ സാന്നിധ്യത്തിൽ മാത്രമേ എല്ലാ ബീച്ചുകളിലും നീന്തൽ അനുവദിക്കൂ. ചുവന്ന കൊടി ഉയർത്തിയിരിക്കുന്നയിടങ്ങളിൽ നീന്തുന്നത്​ അപകടകരമാണ്​. മഞ്ഞക്കൊടി അതീവ ശ്രദ്ധ പുലർത്തണമെന്നതിനെ സൂചിപ്പിക്കുന്നു. ഉമ്മു സുഖീം ഒന്ന്​ ബീച്ച് ഒഴികെയുള്ള ബീച്ചുകളിൽ പകൽ സമയത്ത് മാത്രമേ നീന്താൻ പാടുള്ളൂ.

ഉമ്മു സുഖീമിൽ അർധരാത്രിവരെ നീന്താം. പൊതു ബീച്ചുകളിൽ ഒൻപത് പ്രധാന റെസ്ക്യൂ പ്ലാറ്റ്ഫോമുകളും 21 സബ്-റെസ്ക്യൂ പ്ലാറ്റ്ഫോമുകളുമുണ്ട്. 100 ലൈഫ് ഗാർഡുകൾ, പരിശീലകർ, സൂപ്പർവൈസർമാർ എന്നിവരുടെ സംയോജിത രക്ഷാസംവിധാനവും മുനിസിപ്പാലിറ്റി ഏർപ്പെടുത്തിയിട്ടുണ്ട്. ഇതിൽ 100 ​​ലേറെ രക്ഷാ സ്​ലൈഡുകൾ, ലൈഫ് ജാക്കറ്റുകൾ, മറൈൻ റെസ്ക്യൂ റോബോട്ടുകൾ എന്നിവ ഉൾപ്പെടുന്നു. ഇതുകൂടാതെ, അഞ്ച് കടൽ ബൈക്കുകൾ, 10 ബീച്ച് ബൈക്കുകൾ എന്നിവയും നൽകിയിട്ടുണ്ട്.

ഹൃദയമിടിപ്പ്​ ക്രമീകരിക്കാനുള്ള ഉപകരണങ്ങൾ, ഓക്സിജൻ സിലിണ്ടറുകൾ, പ്രാഥമിക രക്ഷാപ്രവർത്തനത്തിനുള്ള മെഡിക്കൽ ഉപകരണങ്ങൾ എന്നിവ ഉൾപ്പെടെയുള്ള പ്രഥമ ശുശ്രൂഷാ ഉപകരണങ്ങളും ഒരുക്കിയിട്ടുണ്ട്. www.dubaicoast.dm.gov.ae എന്ന വെബ്​സൈറ്റിൽ കടലി​​​െൻറ അവസ്​ഥയെക്കുറിച്ച്​ മനസിലാക്കാം. കാറ്റി​​​െൻറ വേഗം മുതൽ തിരയുടെ ശക്തി വരെ ഇതിൽ ഉൾപ്പെടുത്തിയിട്ടുണ്ട്. വരുന്ന അവധി ദിവസങ്ങളിൽ ദിവസം രണ്ട്​ തവണ വീതം വെബ്​സൈറ്റിലെ വിവരങ്ങൾ പുതുക്കുമെന്ന്​ അധികൃതർ അറിയിച്ചു.