ദഫ്​റ മേഖലയിൽ ഹിപ്പോപ്പൊട്ടാമസ്​ ഇനത്തിലെ മൃഗം ജീവിച്ചിരുന്നതായി പഠനം

അബൂദബി: അബൂദബിയിലെ ദഫ്​റ മേഖലയിൽ ഹിപ്പോപ്പൊട്ടാമസ്​ ഇനത്തിലെ മൃഗം ജീവിച്ചിരുന്നതായും കാലാന്തരത്തിൽ ഇവക്ക്​ വംശനാശം സംഭവിക്കുകയായിരുന്നുവെന്നും പഠനം. പാലിയോ വെറ​െട്ടബ്രാറ്റ മാഗസിനിൽ പ്രസിദ്ധീകരിച്ച ഫോസിൽ പഠനത്തിലാണ്​ ഇക്കാര്യം വ്യക്​തമാക്കുന്നത്​. ആർക്കിയോപൊട്ടാമസ്​ ക്വെഷ്​ട എന്നാണ്​ ഇൗ മൃഗത്തിന്​ ഗവേഷകർ നൽകിയിരിക്കുന്ന പേര്​. ആർക്കിയോപൊട്ടാമസ് എന്നാൽ പുരാതന നദി എന്നാണ്​ അർഥം. പാട എന്നർഥമുള്ള ഇൗജിപ്​ഷ്യൻ വാക്കാണ്​ ക്വെഷ്​ട​. 

2003 മുതൽ കണ്ടെത്തിയ ഫോസിൽ സാമ്പിളുകൾ അടിസ്​ഥാനമാക്കി നടത്തിയ പഠനമാണ്​ ശാസ്​ത്രജ്ഞരെ പുതിയ ജീവിയെ തിരിച്ചറിയുന്നതിലേക്ക്​ നയിച്ചത്​. അബൂദബിയുടെ പുരാതന പരിസ്​ഥിതി വിജ്ഞാനീയത്തിലേക്ക്​ മുതൽക്കൂട്ടാകുന്ന പ്രധാനപ്പെട്ട അറിവാണിതെന്ന്​ പഠനം നടത്തിയ ​ഗവേഷകരിലൊരാളും അബൂദബി വിനോദസഞ്ചാര^സാംസ്​കാരിക അതോറിറ്റിയുടെ (ടി.സി.എ അബൂദബി) പരിസ്​ഥിതി ചരിത്ര വിഭാഗം തീ​രദേശ പുരാവസ്​തു^ഫോസിൽ മേധാവിയുമായ ഡോ. മാർക്​ ബീച്ച്​ അഭിപ്രായപ്പെട്ടു. ദഫ്​റയിലെ അന്താരാഷ്​ട്ര പ്രാധാന്യമുള്ള ഫോസിൽ ഇടങ്ങളിൽ കൂടുതൽ അന്വേഷണം നടത്താൻ ടി.സി.എ അബൂദബിക്ക്​ പദ്ധതിയുള്ളതായും അദ്ദേഹം വ്യക്​തമാക്കി.